پاکستانی سپر اسٹار ماہرہ خان کو 41 سال کی عمر میں پریگننٹ ہونے پر ’بوڑھی خاتون‘ قرار دینا ٹی وی چینل کو مہنگا پڑ گیا، سوشل میڈیا صارفین نے الفاظ کے انتخاب پر شدید ناراضی کا اظہار کیا ہے۔
ماہرہ خان نے حال ہی میں پریگننسی کی خوشخبری مداحوں کے ساتھ شیئر کی۔ انہوں نے اس حوالے سے اپنے جذبات کا اظہار کرتے ہوئے بتایا کہ 41 سال کی عمر میں دوبارہ ماں بننے کا تجربہ ان کیلئے 24 سال کی عمر کے مقابلے میں جسمانی اور جذباتی طور پر مختلف ہے۔
اسی موضوع پر نجی ٹیلی ویژن چینل کے ایک پروگرام میں طبی ماہرین کے ساتھ زیادہ عمر میں حمل سے متعلق گفتگو کی گئی، تاہم پروگرام کے دوران ماہرہ خان کیلئے ’بوڑھی خاتون‘ کے الفاظ استعمال کیے گئے جس پر سوشل میڈیا صارفین اعتراض کر رہے ہیں۔
صارفین کا کہنا ہے کہ 41 سالہ خاتون کیلئے اس طرح کے الفاظ کا استعمال نامناسب اور غیرضروری ہے۔
ایک صارف نے ردعمل دیتے ہوئے لکھا کہ اگر کوئی خاتون صحت مند ہے تو 40 سال کی عمر کو بڑھاپا قرار نہیں دیا جا سکتا، جبکہ ایک اور خاتون نے اپنا تجربہ شیئر کرتے ہوئے بتایا کہ انہوں نے بھی 41 سال کی عمر میں قدرتی طور پر حمل ٹھہرنے کا تجربہ کیا۔
