کم محنت میں ہینڈسم اور اسٹائلش کیسے نظر آئیں؟ 'کلین بوائے ٹرینڈ' کے بارے میں جانیے

---

سوشل میڈیا پر ’کلین گرل ایستھیٹک‘ کے بعد اب ’کلین بوائے ایستھیٹک‘ بھی فیشن اور گرومنگ کے نئے ٹرینڈ کے طور پر توجہ حاصل کر رہا ہے۔

اس ٹرینڈ کا مقصد بہت زیادہ تیار ہوئے بغیر صاف ستھرا، سادہ اور اسٹائلش نظر آنا ہے۔ یعنی ایسا لک جس میں لباس سے لے کر بالوں اور اسکن کیئر تک ہر چیز سادہ ہو لیکن مجموعی انداز متاثر کن نظر آئے۔

اسکن کیئر سے کریں شروعات

’کلین بوائے‘ لک کیلئے کسی پیچیدہ اسکن کیئر روٹین کی ضرورت نہیں۔ ایک اچھا کلینزر، موئسچرائزر اور سن اسکرین بنیادی چیزیں ہیں۔ مقصد جلد کو صاف اور صحت مند رکھنا ہے۔

بالوں کا خیال بھی ضروری

اس لک میں ہیئر اسٹائل بھی اہم کردار ادا کرتا ہے۔ ہلکا میسی لک یا سلیک بیک ہیئر میں سے کوئی بھی اسٹائل اپنایا جا سکتا ہے، بس بال صاف اور اچھی طرح سیٹ ہونے چاہئیں۔

لباس کیسا ہونا چاہیے؟

’کلین بوائے‘ فیشن میں نیوٹرل رنگ اور سادہ ڈیزائن زیادہ پسند کیے جاتے ہیں۔ سفید، بلیک، بیج، گرے اور دوسرے ہلکے رنگوں کے سادہ کپڑے اس لک کیلئے موزوں رہتے ہیں۔

بہت زیادہ شوخ رنگ، بڑے پرنٹس اور ایک ہی لباس میں کئی مختلف ڈیزائن شامل کرنے کے بجائے سادہ اور اچھی فٹنگ والے کپڑوں کو ترجیح دی جاتی ہے۔