بالی ووڈ اداکار سلمان خان کی تنقید کے بعد اداکارہ کترینہ کیف کے وزن پر تبصرہ کرنے والے پاکستانی آر جے ڈاکٹر اعجاز وارث نے معافی مانگ لی۔
ڈاکٹر اعجاز وارث نے انسٹاگرام پر ویڈیو جاری کرتے ہوئے کہا کہ انہوں نے بگ باس 20 میں سلمان خان کی گفتگو دیکھی، جس کے بعد انہیں احساس ہوا کہ کترینہ کیف سے متعلق ایسے الفاظ استعمال نہیں کرنے چاہیے تھے۔
انہوں نے وضاحت کی کہ ویڈیو کو دلچسپ بنانے کیلئے مذاق میں یہ بات کہی تھی، تاہم ان کا مقصد کترینہ کو ’باڈی شیم‘ کرنا نہیں تھا۔
آر جے نے کترینہ کیف اور اپنے الفاظ سے دکھی ہونے والے افراد سے معذرت کرتے ہوئے اعتراف کیا کہ ان کے الفاظ تکلیف دہ ہو سکتے ہیں اور وہ انہیں واپس لینا چاہتے ہیں۔
واضح رہے کہ سلمان خان نے حال ہی میں بگ باس 20 کے دوران حمل کے باعث وزن بڑھنے پر خواتین کو ٹرول کرنے والوں کو تنقید کا نشانہ بنایا تھا۔
سلمان خان کا کہنا تھا کہ حمل کے بعد وزن بڑھنا معمول کی بات ہے اور کترینہ جب دوبارہ فلموں میں کام شروع کریں گی تو خود کو فٹ کر لیں گی۔
