بازار سے تازہ پھل اور سبزیاں گھر لانے کے بعد اکثر لوگ انہیں فوراً دھو کر فریج میں رکھ دیتے ہیں تاکہ ضرورت کے وقت سیدھا استعمال کیا جا سکے، لیکن یہ طریقہ درست نہیں۔
سبزیوں کو صاف کر کے رکھنا بظاہر بہتر لگتا ہے، تاہم انہیں گیلی حالت میں فریج میں رکھنا ان کے جلد خراب ہونے کی وجہ بن سکتا ہے۔
ان طریقوں سے سبزیوں کو کچھ دنوں تک تازہ اور خراب ہونے سے بچایا جا سکتا ہے۔
سبزیاں پہلے دھوئیں یا فریج میں رکھیں؟
اگر پھل اور سبزیاں فوری استعمال نہیں کرنی تو بہتر ہے کہ انہیں بغیر دھوئے، خشک حالت میں محفوظ کیا جائے۔
دھونے کے بعد ان کی سطح پر موجود نمی فریج میں برقرار رہ سکتی ہے، جس سے بعض پھلوں اور سبزیوں میں پھپھوند یا گلنے سڑنے کا عمل تیز ہو سکتا ہے۔
اس لیے ضرورت کے مطابق سبزیاں نکالیں اور انہیں پکانے یا کھانے سے کچھ دیر پہلے دھوئیں۔
کٹی ہوئی سبزیوں کو ایسے محفوظ کریں
کٹے ہوئے پھل یا سبزیاں کھلی حالت میں فریج میں رکھنے کے بجائے صاف اور ڈھکن والے برتن میں محفوظ کریں۔
اسی طرح فریج میں موجود پھل اور سبزیاں وقتاً فوقتاً چیک کرتے رہیں۔ اگر کوئی چیز گلنا یا خراب ہونا شروع ہو جائے تو اسے فوراً باقی اشیاء سے الگ کر دیں۔
کیا ہر سبزی فریج میں رکھنی چاہیے؟
ضروری نہیں کہ بازار سے آنے والی ہر چیز سیدھی فریج میں جائے۔
آلو، شکرقندی اور خشک پیاز جیسی اشیاء عموماً ٹھنڈی، خشک اور ہوادار جگہ پر بہتر رہتی ہیں۔
درست طریقے سے ذخیرہ کرنے کی معمولی سی عادت نہ صرف پھلوں اور سبزیوں کو زیادہ عرصے تک تازہ رکھ سکتی ہے بلکہ کھانے کے ضیاع کو بھی کم کرنے میں مدد دے سکتی ہے۔
استعمال سے پہلے صفائی ضروری
پھل اور سبزی چاہے فریج میں رکھی گئی ہو یا باہر، استعمال سے پہلے اسے بہتے ہوئے صاف پانی سے اچھی طرح دھونا ضروری ہے۔
خصوصاً سیب، کھیرے اور ایسی دوسری اشیاء جو چھلکے سمیت کھائی جاتی ہیں، انہیں پانی کے نیچے ہاتھوں سے ہلکا سا رگڑ کر صاف کیا جا سکتا ہے۔
تاہم پھل اور سبزیاں دھونے کیلئے صابن یا گھریلو صفائی کے کیمیکلز استعمال نہیں کرنے چاہئیں۔
