جونیئر ٹینس میں نمایاں کامیابی حاصل کرتے ہوئے پاکستان کے محمد یحییٰ اور بھارت کے امرت واتس نے آئی ٹی ایف ورلڈ ٹینس ٹور جونیئرز جے 30 جبوتی کا ڈبلز ٹائٹل اپنے نام کر لیا۔
فائنل میں پاکستان اور بھارت کی جوڑی نے تھائی لینڈ کے ڈیوڈ ایوایو اور سعودی عرب کے احمد بہاء سروجی کو شکست دی۔
پاکستان اور بھارت کی مشترکہ جوڑی نے شاندار کھیل کا مظاہرہ کرتے ہوئے فائنل میں 2-6 اور 4-6 سے کامیابی حاصل کی اور چیمپئن شپ کا ٹائٹل جیت لیا۔
یہ کامیابی بین الاقوامی کھیلوں میں باہمی تعاون اور مثبت جذبے کی عکاسی کرتی ہے۔
ٹینس نوجوان کھلاڑیوں کو باہمی احترام، ٹیم ورک اور کھیل سے مشترکہ لگاؤ کے ذریعے مختلف ممالک کے درمیان تعلقات مضبوط بنانے کا موقع فراہم کرتی ہے۔
پاکستان ٹینس فیڈریشن (پی ٹی ایف) کے صدر جناب عاصم الحق قریشی، سیکریٹری جنرل کرنل ضیاء الدین طفیل اور پی ٹی ایف کی انتظامیہ نے محمد یحییٰ کو اس شاندار کامیابی پر مبارک باد پیش کی۔
انہوں نے ان کی عمدہ کارکردگی اور کھیل کے جذبے کو سراہا اور بین الاقوامی جونیئر ٹینس میں ان کی مزید کامیابیوں کے لیے نیک تمناؤں کا اظہار کیا ہے۔
