معروف ٹیکنالوجی کمپنی ایپل کے نئے فولڈنگ اسمارٹ فون آئی فون ڈوو کی پری آرڈرز بکنگ شروع ہوتے ہی صارفین کی بڑی تعداد نے اسے خریدنے میں دلچسپی ظاہر کی جس کے باعث بکنگ شروع ہونے کے صرف آدھے گھنٹے بعد ہی خریداروں کو فون کی ڈیلیوری کے لیے کئی ماہ انتظار کرنے کا بتایا جانے لگا۔
ایپل نے گزشتہ ماہ ایک تقریب کے دوران آئی فون ڈوو متعارف کرایا تھا جس کے ساتھ آئی فون 18 پرو اور آئی فون 18 پرو میکس بھی پیش کیے گئے تھے۔
آئی فون ڈوو کمپنی کا پہلا فولڈنگ اسمارٹ فون ہے جسے آئی فون کے تقریباً 20 سالہ سفر کے دوران ڈیزائن میں ایک بڑی تبدیلی قرار دیا جا رہا ہے۔
کمپنی کے اعلان کے مطابق نئے فولڈنگ فون کے پری آرڈرز 16 اکتوبر سے شروع ہونا تھے جبکہ اس کی باقاعدہ فروخت اور ابتدائی خریداروں کو ڈیلیوری 23 اکتوبر سے شروع ہونے کا اعلان کیا گیا تھا۔
امریکا اور برطانیہ، دونوں ممالک میں ایپل کے آن لائن اسٹورز پر صارفین کو بتایا گیا کہ اب آرڈر دینے کی صورت میں فون 22 جنوری تک موصول نہیں ہوگا۔
نئے فولڈنگ فون کی پری آرڈرز شروع ہونے کے فوری بعد ڈیلیوری میں تاخیر کی اطلاعات سامنے آنے سے اس ڈیوائس کی ابتدائی طلب میں اضافے کا عندیہ ملتا ہے۔ تاہم، فون کی مجموعی فروخت اور دستیابی سے متعلق تفصیلات سامنے آنا ابھی باقی ہیں۔
