ایران نے خبردار کیا ہے کہ یمن کی جنگ میں مصر یا کسی دوسرے ملک کی فوجی مداخلت سے تنازع مزید پیچیدہ ہوجائے گا۔
خبر رساں ادارے اے ایف پی کے مطابق ایرانی وزیر خارجہ عباس عراقچی نے کہا کہ مصر کو اس پیچیدہ جنگ میں الجھنے سے گریز کرنا چاہیے کیونکہ بیرونی مداخلت سے مسئلے کا حل مزید مشکل ہوجائے گا۔
ایرانی وزیر خارجہ نے مزید کہا کہ مصر کو ایسے پیچیدہ تنازع سے دور رہنے کے لیے اپنے سابق تجربات سے فائدہ اٹھانا چاہیے۔
عباس عراقچی نے یہ بھی کہا کہ مصر نے ایران کو یقین دہانی کرائی ہے کہ وہ یمن میں براہ راست جنگ میں شریک نہیں ہوگا۔
یاد رہے کہ مصر کے صدر عبدالفتاح السیسی نے پارلیمنٹ سے بیرون ملک فوجی کارروائیوں کی اجازت دینے کی درخواست بھی کی تھی۔
تاہم حوثیوں کے خلاف ممکنہ فوجی اقدام پر پارلیمانی بحث 26 اکتوبر تک مؤخر کردی گئی ہے۔
دوسری جانب ایرانی وزیر خارجہ نے یہ بھی بتایا کہ ایران نے سعودی عرب اور حوثیوں کے درمیان مذاکرات کرانے کی پیشکش کی تھی۔
ان کے بقول ایران کی سفارتی کوششیں تنازع کے خاتمے میں مدد دے سکتی ہیں تاہم ابھی تک دونوں فریقوں کی جانب سے جواب موصول نہیں ہوا۔
واضح رہے کہ حوثیوں نے باب المندب میں سعودیہ کی بحری ناکہ بندی کر رکھی ہے جب کہ سعودی شہروں میں مختلف اہداف کو بھی نشانہ بنا رہے ہیں جس میں متعدد افراد کے جاں بحق ہونے کی تصدیق بھی ہوئی ہے۔
