صاف اور چمکدار دانت نہ صرف مسکراہٹ کو خوبصورت بناتے ہیں بلکہ منہ کی اچھی صحت کی علامت بھی ہوتے ہیں۔
چائے، کافی، تمباکو نوشی اور صفائی کی بعض عادات کے باعث دانتوں پر پیلے دھبے نمایاں ہونے لگتے ہیں۔
دانت پیلے کیوں ہوتے ہیں؟
دانتوں کی رنگت متاثر ہونے کی کئی وجوہات ہو سکتی ہیں جن میں چائے اور کافی کا زیادہ استعمال، سگریٹ نوشی، پان اور تمباکو، دانتوں کی مناسب صفائی نہ کرنا اور بڑھتی عمر شامل ہیں۔
عمر بڑھنے کے ساتھ دانتوں کی بیرونی حفاظتی تہہ یعنی اینامل پتلی ہو سکتی ہے، جس کے باعث اندر موجود زرد رنگ کی تہہ زیادہ نمایاں ہونے لگتی ہے۔
دانتوں کو صاف اور چمکدار رکھنے کے آسان طریقے
دن میں دو مرتبہ برش کریں
فلورائیڈ والے ٹوتھ پیسٹ سے روزانہ دو مرتبہ کم از کم دو منٹ برش کرنا دانتوں کی صفائی کا بنیادی طریقہ ہے۔ دانتوں کے درمیان صفائی کے لیے روزانہ ڈینٹل فلاس بھی استعمال کرنا چاہیے۔
بیکنگ سوڈا کا استعمال
بیکنگ سوڈا دانتوں کی سطح پر موجود بعض دھبے صاف کرنے میں مدد دے سکتا ہے، اسی لیے اسے مخصوص ٹوتھ پیسٹ میں شامل کیا جاتا ہے۔
تاہم گھر میں بیکنگ سوڈا ملا کر بار بار دانت رگڑنے کے بجائے محفوظ اور آزمودہ ٹوتھ پیسٹ استعمال کرنا بہتر ہے۔
ناریل کے تیل سے کلیاں
ناریل یا تل کے تیل سے کلیاں کرنا ایک قدیم گھریلو طریقہ ہے، جسے آئل پلنگ کہا جاتا ہے۔
پھل اور سبزیاں کھائیں
تازہ پھل اور سبزیاں متوازن غذا اور منہ کی صحت کے لیے فائدہ مند ہیں۔
چائے، کافی اور تمباکو سے احتیاط
چائے، کافی اور تمباکو دانتوں پر دھبوں کا باعث بن سکتے ہیں۔ ان کا استعمال محدود کرنے اور کھانے پینے کے بعد پانی سے کلی کرنے سے دانتوں پر نئے دھبے بننے کے امکانات کم کیے جا سکتے ہیں۔
ہائیڈروجن پرآکسائیڈ سے دانت سفید
ہائیڈروجن پرآکسائیڈ دانت سفید کرنے والی بعض مصنوعات میں استعمال ہوتا ہے، لیکن اسے گھر میں خود سے ملا کر دانتوں پر لگانا یا اس سے کلیاں کرنا نقصان دہ ہو سکتا ہے۔
دانت سفید کرنے کا محفوظ طریقہ کیا ہے؟
ماہرین کے مطابق دانتوں کی روزانہ صفائی اور مناسب ٹوتھ پیسٹ کا استعمال سطحی دھبے کم کرنے میں مددگار ہے۔
اگر دانت بہت زیادہ پیلے ہوں یا ان کی رنگت تبدیل ہو رہی ہو تو ڈینٹسٹ سے معائنہ کروانا بہتر ہے۔ ضرورت کے مطابق پیشہ ورانہ صفائی یا ڈاکٹر کی نگرانی میں دانت سفید کرنے کا علاج کیا جا سکتا ہے۔
یاد رکھیں، صحت مند دانتوں کا بالکل سفید ہونا ضروری نہیں۔ اصل اہمیت دانتوں کی مضبوطی اور ان کی صحت ہے۔
