انگلش فٹبال کے کاراباؤ کپ میں تاریخ کا بڑا اپ سیٹ سامنے آیا ہے جہاں لیگ ٹو کی ٹیم فلیٹ ووڈ ٹاؤن نے مضبوط حریف آرسنل کو پنالٹی شوٹ آؤٹ میں 3-5 سے شکست دے کر کوارٹر فائنل میں جگہ بنا لی۔
انگلش فٹبال کے چوتھے درجے میں کھیلنے والی فلیٹ ووڈ ٹاؤن نے اپنے ہوم گراؤنڈ ہائیبری اسٹیڈیم میں آرسنل جیسی بڑی ٹیم کو شکست دے کر کلب کی تاریخ کی اہم ترین کامیابیوں میں سے ایک حاصل کی۔
اسٹیڈیم کے اوپر ڈرون نظر آنے کے بعد میچ کے ابتدائی مرحلے میں آٹھ منٹ سے زائد وقت کے لیے کھیل روک دیا گیا تھا۔
دونوں ٹیموں کی رینکنگ میں 84 درجوں کا فرق تھا جس کے باوجود میزبان ٹیم نے شاندار کھیل پیش کیا۔
میچ کے 21ویں منٹ میں آرون لوپالو بی نے گول کرکے فلیٹ ووڈ ٹاؤن کو برتری دلائی۔
آرسنل نے دوسرے ہاف میں وکٹر گیوکیریس کے گول کی بدولت مقابلہ برابر کر دیا تاہم مقررہ وقت میں مزید کوئی گول نہ ہو سکا۔
میچ کے 86ویں منٹ میں آرسنل کو اس وقت بڑا دھچکا لگا جب نوجوان کھلاڑی میکس ڈاؤمن مخالف کھلاڑی ہیریسن نیل کے ساتھ ٹکراؤ کے بعد لات چلانے پر ریڈ کارڈ دیکھ کر میدان سے باہر ہو گئے۔
پنالٹی شوٹ آؤٹ میں فلیٹ ووڈ کے گول کیپر جے لنچ نے برونو گیمارائش کی کک روک کر اپنی ٹیم کی جیت کی راہ ہموار کی جبکہ کونر ہاؤگھی نے فیصلہ کن پنالٹی اسکور کرکے فتح پر مہر ثبت کر دی۔
