عالمی منڈی میں خام تیل کی قیمتوں میں کمی ریکارڈ کی گئی ہے کیونکہ مشرقِ وسطیٰ میں امن مذاکرات کی امیدوں نے خطے میں بڑھتی ہوئی کشیدگی اور تیل کی ترسیل متاثر ہونے کے خدشات کو کسی حد تک کم کردیا ہے۔
خبر رساں ادارے رائٹرز کے مطابق جمعرات کو خام تیل کی قیمتیں گزشتہ روز ہونے والے اضافے میں سے کچھ کمی کے ساتھ نیچے آگئیں۔ عالمی معیار سمجھے جانے والے برینٹ کروڈ کے مستقبل کے سودوں کی قیمت 1.22 ڈالر، یعنی 1.1 فیصد کم ہوکر 114.10 ڈالر فی بیرل ہوگئی۔
امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت بھی 1.33 ڈالر، یعنی 1.3 فیصد کمی کے بعد 101.45 ڈالر فی بیرل پر آگئی۔
اس سے ایک روز قبل بدھ کو برینٹ کروڈ کی قیمت میں 1.3 فیصد جبکہ ڈبلیو ٹی آئی کی قیمت میں 3 فیصد اضافہ ریکارڈ کیا گیا تھا۔
رائٹرز کے مطابق قیمتوں میں حالیہ کمی کی ایک اہم وجہ امن مذاکرات کے امکانات ہیں، تاہم مشرقِ وسطیٰ میں جاری کشیدگی اور خطے سے تیل کی فراہمی متاثر ہونے کے خدشات اب بھی مارکیٹ پر اثرانداز ہو رہے ہیں۔
عالمی توانائی کی منڈی میں خام تیل کی قیمتوں کا انحصار خطے کی سکیورٹی صورت حال، تیل کی رسد اور سفارتی پیش رفت پر ہے۔ اگر کشیدگی میں اضافہ ہوتا ہے یا تیل کی ترسیل متاثر ہوتی ہے تو قیمتوں پر دوبارہ دباؤ بڑھ سکتا ہے، جبکہ مذاکرات میں پیش رفت رسد سے متعلق خدشات کم کرنے میں مدد دے سکتی ہے۔
