ایران نے اقوام متحدہ کی سلامتی کونسل میں امریکا اور اسرائیل کی فوجی کارروائیوں اور بحری ناکہ بندی کو سخت تنقید کا نشانہ بناتے ہوئے کہا ہے کہ خلیج فارس اور آبنائے ہرمز میں بحری عدم تحفظ کی بنیادی وجہ واشنگٹن کے اقدامات ہیں۔
ایرانی نشریاتی ادارے پریس ٹی وی کے مطابق اقوام متحدہ کی سلامتی کونسل میں ایران کے نمائندے نے اپنے بیان میں کہا کہ امریکا اور اسرائیل کی جاری فوجی جارحیت اور امریکی بحری ناکہ بندی نے خطے میں سمندری سلامتی کو خطرے سے دوچار کر دیا ہے۔
ایرانی نمائندے کا کہنا تھا کہ خلیج فارس اور آبنائے ہرمز میں بحری عدم تحفظ کے اسباب کو سمجھنے کے لیے امریکی اقدامات کو نظرانداز نہیں کیا جا سکتا۔ ان کے مطابق واشنگٹن کی پالیسی ہی اس صورت حال کی بنیادی وجہ ہے۔
ایران نے سلامتی کونسل میں یہ مؤقف ایسے وقت میں پیش کیا ہے جب خلیج فارس اور آبنائے ہرمز میں کشیدگی کے باعث بحری آمدورفت اور عالمی تیل کی ترسیل کو لاحق خطرات پر تشویش بڑھ رہی ہے۔
