تہران: ایک اعلیٰ ایرانی عہدیدار نے کہا ہے کہ ایران اور امریکا جنگ کے خاتمے کے لیے کسی معاہدے تک پہنچنے سے ابھی کافی دور ہیں۔ ان کے مطابق تہران امریکی مطالبات کو حد سے زیادہ سمجھتا ہے اور انہیں قبول نہیں کرے گا۔
غیر ملکی خبر رساں ایجنسی سے گفتگو کرتے ہوئے ایرانی عہدیدار نے کہا کہ اگر امریکا آبنائے ہرمز کو دوبارہ کھلوانا چاہتا ہے تو اسے ایران کی شرائط پوری کرنا ہوں گی۔ ان کے بقول، اس کے بعد جوہری معاملے پر مذاکرات شروع کیے جاسکتے ہیں۔
ایرانی عہدیدار کے مطابق ثالث ایران اور امریکا کے درمیان اختلافات کم کرنے اور کسی ممکنہ سمجھوتے کی راہ ہموار کرنے کے لیے بھرپور کوششیں کر رہے ہیں، تاہم دونوں ممالک کے درمیان اہم معاملات پر اختلافات برقرار ہیں۔
انہوں نے خبردار کیا کہ اگر امریکا نے ایران پر دوبارہ حملے کیے تو تہران خطے کے اندر اور اس سے باہر بھرپور جواب دینے کے لیے تیار ہے۔
ایرانی عہدیدار کے بیان سے ظاہر ہوتا ہے کہ جنگ کے خاتمے، آبنائے ہرمز اور جوہری مذاکرات سے متعلق معاملات پر دونوں ممالک کے درمیان اتفاقِ رائے تاحال نہیں ہوسکا۔
