واشنگٹن: امریکی صدر ڈونلڈ ٹرمپ پیر کو وائٹ ہاؤس میں قطر کے وزیراعظم شیخ محمد بن عبدالرحمان آل ثانی سے ملاقات کریں گے۔ ملاقات ایسے وقت میں ہو رہی ہے جب ایران کے ساتھ جاری تنازع ختم کرانے کی سفارتی کوششوں کو اہم رکاوٹوں کا سامنا ہے۔
خبر رساں ادارے رائٹرز کے مطابق دونوں رہنماؤں کی ملاقات میں ایران سے متعلق صورت حال اور جنگ کے خاتمے کے لیے جاری کوششوں پر تبادلہ خیال متوقع ہے۔
قطر امریکا اور ایران کے درمیان ثالثی کا کردار ادا کر رہا ہے اور دونوں ممالک کو مذاکرات کے ذریعے کسی ممکنہ سمجھوتے تک پہنچانے کی کوششوں میں مصروف ہے۔ تاہم سفارتی ذرائع کے مطابق تنازع کے حل کی راہ میں اب بھی کئی اہم مسائل موجود ہیں۔
قطر خطے میں کشیدگی کم کرنے اور امریکا و ایران کے درمیان رابطے برقرار رکھنے کے لیے اہم سفارتی کردار ادا کر رہا ہے۔ قطری وزیراعظم اس سے قبل بھی مذاکرات میں پیش رفت اور کسی ممکنہ معاہدے کے امکانات پر اعتماد کا اظہار کر چکے ہیں۔
ٹرمپ اور قطری وزیراعظم کی آئندہ ملاقات کو اسی سفارتی عمل کے تناظر میں اہم قرار دیا جا رہا ہے۔ تاہم وائٹ ہاؤس کی ملاقات کے ایجنڈے یا کسی ممکنہ فیصلے کی تفصیلات تاحال سامنے نہیں آئی ہیں۔
