نوازشریف اور چوہدری نثار کے خلاف قتل کے مقدمے درج کرائیں گے عمران خان

نوازشریف اپنی کرسی بچانے کی جنگ لڑرہے ہیں، عمران خان فوٹو: فائل

---

KARACHI: پاکستان تحریک انصاف کے چیئرمین عمران خان کہتے ہیں کہ وہ وزیراعظم نواز شریف اور چوہدری نثار علی خان کے خلاف قتل کے مقدمے اور ان کا نام ای سی ایل میں شامل کرائیں گے۔

اسلام آباد میں مظاہرین سے خطاب کرتے ہوئے تحریک انصاف کے چیئرمین کا کہنا تھا کہ پُرامن احتجاج کرنا ہمارا آئینی حق ہے،پورے اسلام آباد کو سیل کیا گیا،طاہرالقادری اور ہمارا اتفاق تھا کہ ہم پُرامن رہیں گے، پُرامن احتجاج پرایساتشدد نہیں ہوتا لیکن نہتے لوگوں پرحملہ کیا گیا، پُرامن لوگوں پرگولیاں چلائی گئی،شیلنگ کرکے عالمی قوانین کی خلاف ورزی کی گئی، مظاہرین نے جان بچانے کے لئے پارلیمنٹ کا دروازہ توڑا،میڈیا نے سچ دکھایا تو میڈیا پربھی حملہ کیا گیا، وہ ڈاکٹر طاہر القادری اور ان کے کارکنوں کو مبارکباد دیتے ہیں کہ انہوں نے جنگ جیت لی ہے۔ نواز شریف نے تمام اداروں کو قابو کرنے کی کوشش کی ہے، جمہوریت کے نام پرنوازشریف کو بادشاہت چاہئے، ان کی آمریت کا پول کھل گیاہے، کل حکومت کیا کرلے گی، وہ گولی بھی چلائے ہم جانے والے نہیں، کل ہم تیارنہیں تھے، آج ہم تیار ہیں۔ آزادی ملنے تک کارکنوں کے ساتھ رہیں گے۔ انہوں نے کہا کہ اگر خیبر پختونخوا حکومت میں اتنے لوگ احتجاج کریں وہ فوری طور پر اپنی صوبائی حکومت کو مستعفی کراکے نئے انتخابات کرادیں گے۔

اس سے قبل عمران خان نے کہا تھا کہ نوازشریف اپنی کرسی بچانے کی جنگ لڑرہے ہیں وہ ضمیر کے سوداگر ہیں انہوں نے ان کی بھی قیمت لگائی لیکن وہ بکنے والے نہیں، وہ عمران خان ہیں نوازشریف نہیں،اللہ تبارک و تعالیٰ نے انہیں وزیراعظم بنے بغیرہی عزت دی ہے، اب کچھ بھی ہوجائے نوازشریف اور شہباز شریف کو نہیں چھوڑیں گے۔احتجاج کرنا ہر پاکستانی کا حق ہے، یہ حق کوئی نہیں چھین سکتا، وہ کارکنوں کو دلیری پر سلام پیش کرتے ہیں، حکومت نے نہتے لوگوں پر تشدد کیا، کارکنوں کی قربانیاں ضائع نہیں جائیں گی۔ چوہدری نثار علی خان کے خلاف مقدمہ درج کروائیں گے۔ آج فیصلے کا دن ہے ہم آخری دم تک ڈٹیں رہیں گے، آج کے بعد سارا پاکستان مظاہرین کو ہیرو سمجھے گا۔