سفید کپڑے پہننے میں خوبصورت اور دلکش لگتے ہیں لیکن اکثر کچھ عرصے بعد ان کی چمک ماند پڑنے لگتی ہے اور ان پر پیلے دھبے نمودار ہو جاتے ہیں۔ آخر ایسا کیوں ہوتا ہے؟
اس کی وجہ صرف کپڑوں کا پرانا ہونا نہیں بلکہ ہماری روزمرہ کی چند عادتیں بھی ہیں۔
سفید کپڑے پیلے کیوں ہوتے ہیں؟
ماہرِ ملبوسات دنیش اگروال کے مطابق پسینہ، جسم کی قدرتی چکنائی اور کپڑے دھونے والے پاؤڈر کی باقیات سفید کپڑوں کے ریشوں میں جمع ہو جاتی ہیں، جو وقت گزرنے کے ساتھ پیلاہٹ پیدا کرتی ہیں۔
خصوصاً سوتی کپڑے نمی اور چکنائی زیادہ جذب کرتے ہیں، اس لیے مناسب صفائی نہ ہونے پر ان کی سفیدی متاثر ہو سکتی ہے۔
اس کے علاوہ ضرورت سے زیادہ واشنگ پاؤڈر یا فیبرک سافٹنر استعمال کرنا بھی نقصان دہ ہے کیونکہ ان کی باقیات کپڑوں میں میل جمع ہونے کا سبب بن سکتی ہیں۔
تیز دھوپ، نمی اور فضائی آلودگی بھی کپڑوں کی رنگت متاثر کر سکتی ہیں۔
سفید کپڑوں کی چمک کیسے برقرار رکھیں؟
ماہرین نے سفید کپڑوں کی چمک برقرار رکھنے کے لیے چند آسان مشورے دیے ہیں:
سفید کپڑوں کو رنگین کپڑوں سے الگ دھوئیں۔
واشنگ پاؤڈر مناسب مقدار میں استعمال کریں۔
کپڑوں کو اچھی طرح دھو کر پاؤڈر کی باقیات نکال دیں۔
داغ لگنے کی صورت میں فوری صفائی کریں۔
کپڑوں کو مکمل خشک ہونے کے بعد الماری میں رکھیں۔
سفید کپڑے صاف، خشک اور ہوا دار جگہ پر محفوظ کریں۔
ماہرین کا کہنا ہے کہ کپڑوں کی درست دیکھ بھال اور دھلائی کی معمولی عادتیں بدل کر ان کی سفیدی اور چمک زیادہ عرصے تک برقرار رکھی جا سکتی ہے۔
