معروف اداکارہ دنانیر مبین نے بین الاقوامی سطح پر اہم کامیابی حاصل کرتے ہوئے ماسکو میں بہترین اداکارہ کا ایوارڈ اپنے نام کر لیا۔
روسی دارالحکومت ماسکو میں انٹرنیشنل یوریشین فلم ایوارڈز، جسے ڈائمنڈ بٹر فلائی فلم ایوارڈز بھی کہا جاتا ہے، کی تقریب منعقد ہوئی، جس میں مختلف ممالک سے تعلق رکھنے والے فنکاروں نے شرکت کی۔
تقریب میں دنانیر مبین کو پاکستانی فلم ’میرا لیاری‘ میں شاندار اداکاری پر بہترین اداکارہ کے اعزاز سے نوازا گیا۔
اداکارہ اس بین الاقوامی ایوارڈ کے لیے نامزد ہوئی تھیں اور بالآخر کامیابی حاصل کرنے میں کامیاب رہیں۔
فلم ’میرا لیاری‘ میں کراچی کے تاریخی علاقے لیاری کی ثقافت اور وہاں کے لوگوں کی زندگی کو نمایاں کیا گیا ہے۔ اس میں کھیلوں کے فروغ اور خواتین کو بااختیار بنانے جیسے اہم سماجی موضوعات کو بھی اجاگر کیا گیا ہے۔
