’میرے ساتھ کچھ عجیب ہو رہا ہے‘، برطانوی اداکار رسل برینڈ کا جیل سے اہم پیغام

اداکار نے اپنے پیغام میں کہا کہ وہ ان جرائم کے مرتکب نہیں جن کی وجہ سے انہیں جیل بھیجا گیا ہے، اس لیے ان کے ساتھ کچھ غیر معمولی ہو رہا ہے۔


ویب ڈیسک November 17, 2026

معروف برطانوی اداکار اور کامیڈین رسل برانڈ نے جنسی زیادتی اور جنسی حملوں کے مقدمے میں سزا سنائے جانے کے بعد جیل سے اپنا پہلا پیغام جاری کرتے ہوئے خود کو بے گناہ قرار دے دیا۔

غیر ملکی میڈیا کے مطابق رسل برانڈ کی اہلیہ لورا برانڈ نے اپنے شوہر کا تحریری پیغام ان کے یوٹیوب چینل پر جاری ہونے والی ویڈیو میں پڑھ کر سنایا۔

اداکار نے اپنے پیغام میں کہا کہ وہ ان جرائم کے مرتکب نہیں جن کی وجہ سے انہیں جیل بھیجا گیا ہے، اس لیے ان کے ساتھ کچھ غیر معمولی ہو رہا ہے۔

انہوں نے اپنے حامیوں کا شکریہ ادا کرتے ہوئے مذہبی عقائد، معافی اور ایک دوسرے کے لیے دعا کرنے کی اہمیت پر بھی زور دیا۔

رسل برانڈ نے جیل کے عملے کے رویے کی تعریف کی اور مداحوں سے اپنی اہلیہ اور خاندان کی حمایت جاری رکھنے کی درخواست کی۔

واضح رہے کہ لندن کی ساؤتھ وارک کراؤن کورٹ میں چار ہفتوں تک جاری رہنے والے مقدمے میں رسل برانڈ کو جنسی زیادتی کے ایک اور جنسی حملوں کے تین الزامات میں مجرم قرار دیا گیا تھا۔

عدالت نے انہیں 10 سال اور 6 ماہ قید کی سزا سنائی۔

دوسری جانب مزید چھ خواتین نے بھی اداکار پر مبینہ جنسی بدسلوکی کے الزامات عائد کیے ہیں۔