ارجنٹائن: فٹبال میچ کے دوران گیند سر پر لگنے سے نوجوان کھلاڑی ہلاک

واقعے کے بعد فٹبالر کو بے ہوشی حالت میں اسپتال منتقل کیا گیا جہاں وہ جانبر نہ ہوسکا


ویب ڈیسک November 19, 2026

ارجنٹائن میں فٹبال میچ کے دوران حریف ٹیم کے کھلاڑی کی جانب سے کلیئر کی گئی گیند سر پر لگنے کے باعث 18 سالہ فٹبالر جان کی بازی ہار گیا۔

ابیل نونیز نامی نوجوان کھلاڑی ایف سی ایزائزا کی جانب سے حریف ٹیم ڈیپورٹیوو منیز کے خلاف میچ کھیل رہا تھا کہ اس دوران مخالف ٹیم کے دفاعی کھلاڑی کی جانب سے زور سے کلیئر کی گئی گیند اس کے سر پر جا لگی۔

واقعے کے بعد نوجوان فٹبالر گراؤنڈ میں ہی بے ہوش ہوکر گر پڑا، جسے فوری طور پر اسپتال منتقل کیا گیا جہاں ڈاکٹروں نے اس کی جان بچانے کے لیے آپریشن بھی کیا لیکن وہ جانبر نہ ہوسکا۔

واقعے کے عینی شاہد کرسٹیان رومپانی نے بتایا کہ میچ کافی پرسکون تھا لیکن کھیل کے دوران کھلاڑیوں کے درمیان گیند چھیننے کے لیے کچھ سخت مقابلہ جاری تھا۔

ایک عینی شاہد نے نوجوان کے اچانک گرنے کے منظر کو باکسنگ مقابلے میں ناک آؤٹ ہونے سے تشبیہ دی۔