کیا کھارا پانی بالوں کے گرنے کی وجہ بن سکتا ہے؟ جانیے

کھارے پانی میں کیلشیم اور میگنیشیم جیسے معدنیات زیادہ مقدار میں موجود ہوتے ہیں


ویب ڈیسک November 20, 2026

بالوں کے گرنے یا کمزور ہونے پر اکثر لوگ شیمپو، تیل یا غذائی کمی کو ذمہ دار سمجھتے ہیں لیکن کیا آپ جانتے ہیں کہ گھر میں استعمال ہونے والا پانی بھی بالوں کی صحت متاثر کر سکتا ہے؟

خاص طور پر جن علاقوں میں بورنگ یا زیرِ زمین پانی استعمال ہوتا ہے، وہاں پانی میں موجود معدنیات بالوں کی خشکی اور ٹوٹنے کا سبب بن سکتی ہیں۔

کھارا پانی بالوں کو کیسے متاثر کرتا ہے؟

کھارے پانی میں کیلشیم اور میگنیشیم جیسے معدنیات زیادہ مقدار میں موجود ہوتے ہیں جو بالوں پر تہہ بنا کر انہیں خشک، کھردرا اور بے رونق کر سکتے ہیں۔

اس کے نتیجے میں بال الجھنے لگتے ہیں اور کنگھی کے دوران ان کے ٹوٹنے کا خطرہ بڑھ جاتا ہے۔

کیا کھارے پانی سے بال جڑوں سمیت گرتے ہیں؟

ماہرین کے مطابق بالوں کے ٹوٹنے اور جڑوں سے گرنے میں فرق ہے۔

کھارا پانی بالوں کو کمزور کر کے ان کے ٹوٹنے کا باعث بن سکتا ہے، لیکن اب تک یہ ثابت نہیں ہوا کہ یہ براہِ راست بالوں کی جڑوں کو متاثر کر کے انہیں گراتا ہے۔

بالوں کے مسلسل گرنے کی دیگر وجوہات میں ہارمونز کی تبدیلی، غذائی کمی، موروثی عوامل اور سر کی جلد کے مسائل شامل ہو سکتے ہیں۔

کھارے پانی سے بالوں کو کیسے بچائیں؟

اگر بال دھونے کے بعد مسلسل خشک اور کھردرے محسوس ہوں تو صرف شیمپو تبدیل کرنے کے بجائے پانی کی سختی بھی چیک کریں۔

بالوں کے مطابق مناسب شیمپو اور کنڈیشنر استعمال کریں، جبکہ معدنیات کی تہہ دور کرنے والے مخصوص شیمپو بھی مددگار ثابت ہو سکتے ہیں۔

اس کے علاوہ گیلے بالوں کو سختی سے رگڑنے اور زور سے کنگھی کرنے سے گریز کریں۔