بھارتی اداکارہ سمانتھا روتھ پربھو اور فلم ساز و ہدایت کار راج نڈی مورو کے ہاں بیٹے کی ولادت ہوئی ہے۔ اداکارہ نے سوشل میڈیا کے ذریعے یہ خوش خبری اپنے مداحوں کے ساتھ شیئر کی اور نومولود کی تصویر کے ساتھ اس کا نام بھی بتایا۔
جوڑے نے اپنے بیٹے کا نام ’دیو نڈی مورو‘ رکھا ہے۔ سمانتھا نے اپنی پوسٹ میں لکھا کہ ان کا خوبصورت بیٹا دیو نڈی مورو 19 نومبر 2026 کو دنیا میں آیا اور یہ ان کی زندگی کا اب تک کا سب سے زیادہ خوشی کا لمحہ ہے۔ پیغام کے اختتام پر سمانتھا اور راج دونوں کے نام درج تھے۔
سمانتھا اور راج نڈی مورو کی پیشہ ورانہ شناسائی 2021 میں ویب سیریز ’دی فیملی مین 2‘ کے دوران ہوئی تھی۔ بعد ازاں دونوں نے ویب سیریز ’سِٹڈیل: ہنی بنی‘ میں بھی ایک ساتھ کام کیا۔ وقت گزرنے کے ساتھ دونوں کی قربتوں سے متعلق خبریں سامنے آنے لگیں، خصوصاً انہیں مختلف تقریبات میں ایک ساتھ دیکھا گیا اور سوشل میڈیا پر بھی وہ ایک دوسرے کی پوسٹس میں دکھائی دینے لگے۔
دونوں نے یکم دسمبر 2025 کو کوئمبٹور کے ایشا یوگا سینٹر میں شادی کی تھی۔ اب بیٹے کی پیدائش کے بعد ان کے خاندان میں ایک نئے فرد کا اضافہ ہوگیا ہے۔