وفاق سے تعلق ختم صوبائی ایچ ای سی جامعات کی انتظامی حیثیت کا تعین کرے گا

صوبائی اعلیٰ تعلیمی کمیشن سندھ کی سرکاری اور نجی جامعات اور اسناد تفویض کرنے والے اداروں کو خطوط جاری کرے گا۔

Safdar Rizvi October 09, 2014

کوآپریٹ اراکین کی شمولیت سے چارٹرادارہ انسپکشن ایویلیوایشن اینڈایکریڈیشن کمیٹی کہلائے گا،2015میں سندھ کی جامعات کو فنڈز صوبائی حکومت جاری کریگی۔ فوٹو: فائل

صوبائی اعلیٰ تعلیمی کمیشن نے سندھ کی جامعات کی قانونی اور انتظامی حیثیت کا تعین خود کرنے کا فیصلہ کیا ہے، آئندہ ہفتے سے صوبائی اعلیٰ تعلیمی کمیشن سندھ کی سرکاری اور نجی جامعات اور اسناد تفویض کرنے والے اداروں کو خطوط جاری کرے گا۔

تفصیلات کے مطابق وفاقی اعلیٰ تعلیمی کمیشن کے قیام کے 12سال بعد سندھ کی جامعات سے اس کے تعلق کے خاتمے کی ابتدا ہوگئی ہے اور صوبائی اعلیٰ تعلیمی کمیشن نے سندھ کی سرکاری اور نجی جامعات کی قانونی اور انتظامی حیثیت کے تعین کا ازخود فیصلہ کیا ہے، صوبائی اعلیٰ تعلیمی کمیشن سندھ کی سرکاری اور نجی جامعات کو خود جانچ وقدر پیمائی (ایکریڈیشن) کے بعدتسلیم کرنے کا عمل شروع کررہی ہے۔

اس سلسلے میں فوری طور پر اقدامات کیے جارہے ہیں اور آئندہ ہفتے سے صوبائی ایچ ای سی کی جانب سے سندھ کی سرکاری ونجی جامعات اوراسناد تفویض کرنے والے اداروں کوخطوط جاری کیے جائیں گے جس کے بعد سندھ کی جامعات کا تعلق وفاقی اعلیٰ تعلیمی کمیشن سے ختم ہوجائے گا اور ان جامعات کی ایکریڈیشن بتدریج وفاقی اعلیٰ تعلیمی کمیشن سے ختم ہوکر صوبائی اعلیٰ تعلیمی کمیشن کے پاس چلی جائے گی، جامعات اپنی خود مختار حیثیت میں وفاقی اعلیٰ تعلیمی کمیشن سے صوبائی اعلیٰ تعلیمی کمیشن کے ماتحت ہوجائیں گی۔

واضح رہے کہ اس وقت سندھ میں17سرکاری جامعات ہیں جبکہ نجی جامعات کے ساتھ مجموعی طور پر جامعات کی تعداد40 کے قریب ہے،صوبائی اعلیٰ تعلیمی کمیشن کے ذرائع سے معلوم ہوا ہے کہ صوبائی اعلیٰ تعلیمی کمیشن کی جانب سے اس سلسلے میں تیاریاں شروع کردی گئی ہیں آئندہ ہفتے سے جامعات سے درخواستیں طلب کی جائیں گی، سندھ کی نجی جامعات کوچارٹر دینے کی سفارش کرنے والے ادارے چارٹر انسپکشن اینڈ ایویلیو ایشن کمیٹی جو ایچ ای سی ایکٹ کی منظوری کے بعد پہلے ہی صوبائی اعلیٰ تعلیمی کمیشن کاحصہ بن چکی ہے۔

مذکورہ کمیٹی کو صوبائی اعلیٰ تعلیمی کمیشن کی نگرانی میں جامعات کی ایکریڈیشن کے لیے جانچ پڑتال کے امور سونپے جائیں گے، ایکریڈیشن کے امورکے سلسلے میں کمیٹی میں کوآپریٹ اراکین بھی شامل ہوں گے جس کے بعدیہ کمیٹی چارٹر انسپکشن ایویلیو ایشن اینڈ ایکریڈیشن کمیٹی کہلائے گی، صوبائی اعلیٰ تعلیمی کمیشن کے ایک اعلیٰ افسرکے مطابق2015 میں متوقع طورپراین ایف سی ایوارڈ کی منتقلی کے بعد سندھ کی سرکاری جامعات کوفنڈز صوبائی حکومت کی جانب سے جاری ہوں گے اور اسی تناظر میں صوبائی اعلیٰ تعلیمی کمیشن نے سندھ کی جامعات کو ایکریڈیشن دینے کافیصلہ کیاہے۔