حفیظ کے بولنگ ایکشن کا ٹیسٹ ہو گیاآج شارجہ میں ٹیم کو جوائن کرلیں گے

آل رائونڈر محمد حفیظ کے بولنگ ایکشن کا بائیو مکینک ٹیسٹ ہوگیا،نتیجہ آئندہ چند روز میں سامنے آ جائے گا۔

Sports Reporter November 25, 2014

محمد حفیظ نے انگلینڈ روانگی سے قبل کہا تھا کہ ان کی پورے ٹیسٹ میچ میں صرف 4گیندیں مشکوک پائی گئی ہیں۔ فوٹو؛فائل

آل رائونڈر محمد حفیظ کے بولنگ ایکشن کا بائیو مکینک ٹیسٹ ہوگیا،نتیجہ آئندہ چند روز میں سامنے آ جائے گا، وہ منگل کو شارجہ پہنچ کر کیویز سے تیسرے ٹیسٹ کیلیے دستیاب ہوں گے۔

موصولہ اطلاعات کے مطابق پیر کو آئی سی سی سے الحاق رکھنے والی لفبرا یونیورسٹی کی لیبارٹری میں جدید کیمروں سے یہ تعین کرنے کی کوشش کی گئی کہ حفیظ کی مختلف ڈلیوریز میں بازو کا خم 15ڈگری کی قانونی حد میں آتا ہے یا نہیں۔ یاد رہے کہ آل رائونڈر کا بولنگ ایکشن کیویز کیخلاف ابوظبی ٹیسٹ کے دوران رپورٹ کیا گیا تھا جس کے بعد انھیں لازمی طور پر 22دن کے اندر بائیومکینک لیب میں اپنی گیندوں کا جائزہ لینے کا پابند کیا گیا تھا۔

اگر ایکشن قانونی حد میں پایا گیا تو انھیں بولنگ کی اجازت ہوگی، دوسری صورت میں معطلی کا صدمہ برداشت کرنا پڑے گا، پھر ایکشن میں درستگی لا کر نئے جائزہ لینے کے بعد ہی بولنگ کا موقع مل سکے گا۔ یاد رہے کہ محمد حفیظ نے انگلینڈ روانگی سے قبل کہا تھا کہ ان کی پورے ٹیسٹ میچ میں صرف 4گیندیں مشکوک پائی گئی ہیں۔