لاہور میں گزشتہ روز لاپتہ ہونے والے 2 بچوں کی لاشیں گندے نالے سے مل گئیں

وقار اور معاویہ گزشتہ شام گھر سے سودا سلف لانے کے لئے نکلے تھے فوٹو: فائل

---

لاہور: سول لائنز سے گزشتہ روز لاپتہ ہونے والے دو بچوں کی لاشیں گندے نالے سے مل گئیں۔

ایکسپریس نیوز کے مطابق سول لائنز کے رہائشی 6 سالہ وقار اور 5 سالہ معاویہ گزشتہ شام گھر سے سودا سلف لانے کے لئے نکلے تھے لیکن کافی دیر گزرنے کے بعد بھی واپس نہ آنے پر ان کے گھر والوں نے بچوں کی تلاش شروع کردی، ناکامی پر والدین نے تھانہ سول لائنز میں ان کی گمشدگی کی رپورٹ درج کرادی۔ مقامی افراد کی اطلاع پر پولیس نے دونوں بچوں کی لاشیں سول لائنز کے گندے نالے سے نکال لی ہیں جنہیں ڈیتھ ہاؤس منتقل کردیا گیا ہے۔

پولیس کا کہنا ہے کہ بچوں کی حالت دیکھ کر ایسا لگتا ہے کہ دونوں بچے کھیل کود کے دوران نالے میں گر گئے اور پھر نکل نہ آسکے جو ان کی موت کی وجہ بنی تاہم اس بارے میں حتمی رائے پوسٹ مارٹم رپورٹ آنے کے بعد ہی دی جاسکے گی۔