پاکستان کی کرکٹ ورلڈ کپ میں دوسری شکست

آئر لینڈ اور زمبابوے کی ٹیمیں اچھا کھیل رہی ہیں ۔ان سے جیتنے کے لیے پاکستانی کھلاڑیوں کو سخت جدوجہد کرنا پڑے گی، فوٹو : رائٹرز

---

پاکستان کی کرکٹ ٹیم ورلڈ کپ ٹورنامنٹ کے اہم میچ میں ویسٹ انڈیز سے ہار گئی۔ پاکستانی ٹیم کی یہ لگاتار دوسری شکست ہے' اپنے پہلے میچ میں وہ بھارتی ٹیم سے ہاری تھی۔ گزشتہ روز نیوزی لینڈ کے شہرکرائسٹ چرچ میں کھیلے جانے والے میچ میں ویسٹ انڈیز نے پہلے بلے بازی کرتے ہوئے 310 رنز بنائے۔ جواب میں پاکستانی ٹیم صرف 160 رنز بنا سکی اور اسے 150 رنز کے بڑے مارجن سے شکست ہوئی۔ کھیل میں ہار جیت ہوتی ہے لیکن پاکستانی ٹیم جس برے طریقے سے ہاری' وہ اس کے شایان شان نہیں ہے۔

قومی ٹیم کے ابتدائی چار بلے باز صرف ایک اسکور پر پویلین لوٹ گئے جب کہ ان میں سے تین کھلاڑی صفر پر آؤٹ ہوئے۔ بیٹنگ' باؤلنگ اور فیلڈنگ میں قومی ٹیم کے کھلاڑیوں کا معیار کلب کرکٹ لیول سے بھی کم نظر آیا۔ ٹیم میں شامل سینئر کھلاڑیوں کی کارکردگی انتہائی غیر معیاری اور مایوس کن رہی۔پاکستانی ٹیم میں اب وسیع پیمانے پر تبدیلیوں کی ضرورت ہے کیونکہ موجودہ سینئر کھلاڑی جونیئرز پر بھی بوجھ بن رہے ہیں۔ جب ایک سینئر کھلاڑی جلد آوٹ ہوتا ہے تو جونیئر کھلاڑی دباؤ میں آجاتا ہے۔

ویسٹ انڈیز سے شکست کے بعد پاکستان کا کوارٹر فائنل تک رسائی حاصل کرنا خاصا مشکل ہو گیا ہے تاہم پاکستان کے لیے ابھی آسان میچ موجود ہیں'اگر پاکستانی ٹیم آئر لینڈ' زمبابوے اور متحدہ عرب امارات کو بڑے مارجن سے شکست دے دیتی ہے تو وہ کوارٹر فائنل تک پہنچ سکتی ہے لیکن ابتدائی دو میچوں میں کھلاڑیوں کی کارکردگی کو سامنے رکھا جائے تو صورت حال خاصی پریشان کن نظر آتی ہے۔

آئر لینڈ اور زمبابوے کی ٹیمیں اچھا کھیل رہی ہیں ۔ان سے جیتنے کے لیے پاکستانی کھلاڑیوں کو سخت جدوجہد کرنا پڑے گی۔قومی ٹیم کی ابتدائی میچوں میں شکست کی ایک وجہ یہ بھی ہو سکتی ہے کہ خاصے عرصے سے پاکستانی کھلاڑیوں نے نیوزی لینڈ اور آسٹریلیا کی وکٹوں پر نہیں کھیلا' ان ممالک کی وکٹوں پر پاکستانی بلے باز ہمیشہ پریشانی کا شکار رہے ہیں۔پاکستانی کھلاڑی ذہنی طور پر بھی مضبوط نظر نہیں آرہے۔ بہر حال پاکستانی کرکٹ ٹیم جس طرح اپنے ابتدائی دونوں میچوں میں ہاری' اس نے شائقین کرکٹ کو انتہائی افسردہ کر دیا۔