شمالی وزیرستان دہشت گردوں کا مرکز ہے حکومت آپریشن پر غور کریگی رحمن ملک

کراچی کے حالات خراب کرنیوالوں سے نمٹناآتاہے،عدلیہ کااحترام کرتاہوں،جب بلایاجائیگاحاضر ہوجائونگا، ایئرپورٹ پرگفتگو۔ فوٹو: اے ایف پی/فائل

---

وفاقی وزیرداخلہ رحمٰن ملک نے کہاہے کہ شمالی وزیرستان دہشت گردوںکامرکزہے۔

حکومت آپریشن پرغورکریگی تاہم شمالی وزیرستان میںآپریشن کافیصلہ سیاسی اورعسکری قیادت کرے گی،طالبان نے ملالہ یوسفزئی پرنہیں بلکہ پوری قوم پرحملہ کیاہے،ملک سے دہشت گردی اورانتہاپسندی کے خاتمے کیلیے پوری قوم متحدہے،ملالہ کی زندگی 36 گھنٹے اہم ہیں،انہیں وینٹی لیٹرپررکھاگیاہے،اگرڈاکٹرزنے تجویزکیاتو ملالہ کو علاج کیلیے جرمنی بھیجا جائے گااورعلاج کے تمام اخراجات ذاتی طور پر صدرزرداری برداشت کریں گے۔

وہ جمعہ کو اسلام آباد سے کراچی پہنچنے کے بعد ایئرپورٹ پر میڈیا سے گفتگو کررہے تھے۔ انھوں نے کہا کہ ملالہ یوسفزئی قوم کی بیٹی ہے،اس نے امن اور تعلیم کی بات کی،دہشت گردی کے خلاف بلندکی، دہشت گردوں نے معصوم بچی کونشانہ بنایا اور اس کوقتل کرنے کی کوشش کی لیکن مارنے والے یہ بھول گئے کہ زندگی اور موت دینے والی ذات اللہ رب العزت کی ہے۔رحمٰن ملک نے کہا کہ ملالہ امن کی سفیر ہے ،پاکستان کے مستقبل کی پہچان ہے،اس وقت اس کی زندگی کے 36 گھنٹے اہم ہیں،پوری قوم دعا کرے۔

انھوں نے کہا کہ ملالہ یوسفزئی کے خاندان کوتین مرتبہ سیکیورٹی کی پیشکش کی گئی تھی لیکن انھوں نے سیکیورٹی لینے سے انکار کردیاتھا،پختونوں کی روایت ہے کہ وہ خواتین پرحملہ نہیں کرتے، ملالہ پر حملہ کرنیوالے مسلمان نہیں بلکہ دہشت گردہیں اور ملک سے دہشت گردوں کے خاتمے کیلیے پوری قوم کومتحد ہو کران کے خلاف لڑناہوگا،کراچی میں ٹارگٹ کلنگ کی سخت مذمت کرتے ہیں،کراچی کے حالات خراب کرنے میں ڈرگ مافیا،اسلحہ مافیااورپرچی مافیااور دیگر جرائم پیشہ عناصرملوث ہے لیکن یہ مافیاوالے سن لیں کہ حکومت کو ان سے نمٹنا آتاہے، کراچی میں ٹارگٹ کلنگ کاہرصورت میں خاتمہ کیاجائے گا۔

رحمٰن ملک نے کہاکہ میں عدلیہ کااحترام کرتاہوں اور عدالت جب مجھے طلب کرے گی میں حاضرہوجائوں گا،منی لانڈرنگ کاہرصورت میں خاتمہ کیاجائے گا،ملک اس وقت حالت جنگ میں ہے،قیاس آرائیوں سے گریز کیا جائے اوراس وقت ہم سب کومتحدہوکرملک کے مستقبل کو محفوظ بنانا ہے۔وفاقی وزیرداخلہ نے کہاکہ پا کستان میںڈرون حملوں کے خلاف دنیابھرمیں آواز بلندہورہی ہے ،خود امر یکامیں بھی اس کی مخالفت ہورہی ہے ،یہ سفارتی محاذپر پاکستان کی بڑی کامیابی ہے،ڈرون حملوں میں زخمی اورمعذور ہونے والے بچوںکے علاج معالجے پرحکومت مکمل توجہ دے گی ،دشمنوں نے ملک کونقصان پہنچانے کی طویل منصوبہ بندی کررکھی ہے،بلوچستان کے مسئلے پر عدالت میںحاضرہوناچاہتاہوں۔