گورننگ بورڈ میٹنگ میں کرکٹ کمیٹی کا ذکر ہی گول

قائد اعظم ٹرافی میں16ٹیمیں حصہ لیں گی جب کہ 4کا فیصلہ آئندہ ماہ شروع ہونے والے کوالیفائنگ راؤنڈ سے ہوگا۔ فوٹو: فائل

---

BARA: پی سی بی گورننگ بورڈ میٹنگ میں حیران کن طور پر کرکٹ کمیٹی کا ذکر ہی گول ہوگیا۔

چیئرمین شہریارخان نے اپنی تجویزکردہ سابق کھلاڑیوں پر مشتمل کمیٹی کا ذکر چھیڑنے سے خود ہی گریزکیا، دوسری جانب ڈومیسٹک کرکٹ میں بہتری کی تجاویز کو منظوری دے دی گئی، قائد اعظم ٹرافی میں16ٹیمیں حصہ لیں گی،4کا فیصلہ آئندہ ماہ شروع ہونے والے کوالیفائنگ رائونڈ سے ہوگا۔

چند روز قبل کراچی میں میڈیا کانفرنس کے دوران چیئرمین پی سی بی شہریارخان نے کہا تھا کہ وہ سابق کرکٹرز پر مشتمل نئی کرکٹ کمیٹی بنائیں گے، اس کی منظوری گورننگ بورڈ سے لی جائے گی، واضح رہے کہ موجودہ کمیٹی کے سربراہ شکیل شیخ نان کرکٹر جبکہ دیگر چاروں ارکان سابق پلیئرز ہیں، یوں صاف ظاہر ہو گیا تھا کہ شہریارخان، شکیل کو ہٹانا چاہتے تھے۔

ذرائع کے مطابق بورڈ کے بعض بااثر ارکان نے انھیں سمجھایا کہ چونکہ سب باتیں میڈیا میں آ چکی ہیں لہذا اب کوئی تبدیلی کرنا تنازع کو دعوت دینے کے مترادف ہوگا، یہی وجہ ہے کہ گذشتہ روز حیران کن طور پر لاہور میں گورننگ بورڈ میٹنگ کے دوران کمیٹی کا ذکر ہی گول ہو گیا۔ دریں اثنا اجلاس میں ڈومیسٹک کرکٹ میں بہتری کیلیے تجاویز منظور کر لی گئیں۔

قائد اعظم ٹرافی میں 16 ٹیمیں حصہ لیں گی، ان میں گولڈ لیگ کی6،6ڈپارٹمنٹل اور ریجنل سائیڈز تو پہلے ہی شامل ہیں، مزید2، 2 کا انتخاب جولائی اور اگست میں شیڈول کوالیفائنگ رائونڈ سے ہوگا، اس میں سلور لیگ کی سائیڈز اور گریڈ ٹو سے پروموٹ ہو کر آنے والی ایک، ایک ریجنل و ڈپارٹمنٹل ٹیم شریک ہوگی۔ علاوہ ازیں میٹنگ میں کلب، ڈسٹرکٹس اور ریجنز کے الگ الگ ماڈل آئین کو بھی منظوری دے دی گئی، اس پر تین ماہ میں عمل درآمد کیا جائے گا۔