دہری شہریت کیس چوہدری وسیم کی رکنیت بحال کارروائی کیلئے شہناز شیخ کی درخواست خارج

وزیرداخلہ کویت جانیکاکہہ کرگئے،تصویرسوات کی چھپی،عدم پیشی پرعدالت برہم،آج دہری شہریت والے ارکان کی فہرست پیش کرنیکا حکم۔ فوٹو: فائل

---

سپریم کورٹ نے مسلم لیگ (ن) کے رکن پنجاب اسمبلی چوہدری وسیم قادرکی نظر ثانی درخواست منظورکرکے دہری شہریت کیس میں ان کی رکنیت بحال کر دی ہے اور وزیرداخلہ رحمن ملک کودہری شہریت رکھنے والے ارکان کی فہرست آج پیش کرنے کاحکم دیا ہے۔

چیف جسٹس افتخارمحمدچوہدری کی سربراہی میں تین رکنی بینچ نے مسلم لیگ (ق)کی مستعفی ہونے والی رکن قومی اسمبلی شہنازشیخ سے تنخواہوں اور دیگر مراعات کی مد میں حاصل کی جانے والی رقم کی وصولی کیلیے سیکریٹری قومی اسمبلی اورقانونی چارہ جوئی کیلیے الیکشن کمیشن کوہدایات جاری کردی ہیں۔عدالت نے رائے مجتبیٰ کھرل کی دہری شہریت کے بارے میں غلط خبر دینے پر رپورٹرکونوٹس جاری کردیا ہے۔

ایم پی اے چوہدری وسیم قادرکی نااہل قراردینے کے فیصلے کے خلاف نظرثانی درخواست کی سماعت پر ان کے وکیل نے بتایاکہ میرے موکل کے پاس ناروے میں مستقل رہائش کا سرٹیفکیٹ ہے شہریت نہیں، ناروے جانے کیلیے انھیںویزا حاصل کرنا پڑتاہے،اس حوالے سے انھوں نے دستاویزات بھی پیش کیں ۔عدالت نے پیش کردہ دستاویزات اور ثبوتوںکی بنیاد پر ان کی رکنیت بحال کر دی ۔شہناز شیخ کے وکیل منیر پراچہ نے بتایا کہ ان کی موکلہ نے قومی اسمبلی کی رکنیت سے استعفیٰ دے دیا ہے۔

عدالت قرار دے کہ دہری شہریت رکھنے والوں سے متعلق الیکشن کمیشن کو دیے گئے احکامات ان پر لاگو نہیں ہوںگے اور نہ ہی مراعات واپس لی جائیںگی،عدالت نے ان کی درخواست مستردکر دی اورحکم دیا کہ ان کے خلاف بھی وہی کارروائی عمل میں لائی جائے جو دیگر نااہل قرار دیے گئے ارکان کے خلاف کی جارہی ہے ۔رکن قومی اسمبلی رائے مجتبیٰ کھرل کی جانب سے منیر پراچہ نے بتایا کہ ان کے موکل کے متعلق غلط خبر شائع کی گئی ۔انھوں نے جب انتخابات میں حصہ لینے کا فیصلہ کیا تو2007میںکینیڈاکی شہریت ترک کر دی تھی،اس سلسلے میں انھوں نے ترک شہریت کا سرٹیفکیٹ بھی پیش کیا۔

چیف جسٹس نے کہاکہ خبر شائع کرنے والے کو تصدیق کرنی چاہیے اور اس بات کا خیال رکھنا چاہیے کہ جس کے خلاف وہ خبر دے رہاہے اس کی معاشرے میںکیا عزت رہ جائے گی ۔عدالت نے رپورٹرعمر چیمہ کو نوٹس جاری کردیے کہ وہ پیش ہوکر وضاحت کریںکہ انھوں نے غلط خبرکیوںدی۔عدالت نے مجتبیٰ کھرل کے وکیل سے کہاکہ عدالت آپ کے دلائل سے مطمئن ہے رپورٹرکی وضاحت کے بعد نوٹس ختم کردیاجائے گا۔عدالت نے وزیر داخلہ رحمٰن ملک کی عدم پیشی کاسخت نوٹس لیا، چیف جسٹس نے کہا انھوں نے اپنے بیان کے مطابق فہرست پیش کرنی تھی ۔

چیف جسٹس نے کہاکہ رحمٰن ملک نے عدالت میں یہ بتایا تھا کہ انھوں نے کویت جاناہے،جسٹس جواد ایس خواجہ نے کہاکہ اخبارمیںان کی تصویرچھپی ہے وہ توغالباًسوات میں ہیں، انھوں نے گزشتہ سماعت پرکہا تھا کہ وہ دہری شہریت رکھنے والے ارکان اسمبلی کی فہرست کی تیاری کیلیے اپنے جوانوںکی ڈیوٹی لگائیںگے سماعت آج پھر ہوگی۔