والدین کے زیادہ قریب بچے مستقبل میں ڈپریشن کا شکار ہوسکتے ہیں تحقیق

والدین کی خصوصی توجہ حاصل کرنے والے بچے بڑے ہوکر اپنے بہن بھائیوں کے مقابلے میں کم حلقہ احباب رکھتے ہیں ،رپورٹ، فوٹو: فائل

---

SUKKUR: والدین اپنے تمام بچوں سے یکساں پیار کرتے ہیں لیکن کوئی ایک ایسا بچہ بھی ہوتا ہے جو دیگر بہن بھائیوں کے مقابلے میں ماں باپ کے زیادہ قریب ہوتا ہے لیکن ایک تحقیق کے مطابق ایسے بچوں میں مستقبل میں ڈپریشن کا شکار ہونے کے خطرات بڑھ جاتے ہیں۔

ماہرین کا کہنا ہے کہ بچپن میں والدین کی خصوصی توجہ کامرکز بننے والے بچوں کو اپنے بہن بھائیوں کی جانب سے رقابت کے جذبات کی وجہ سے مشکلات کا سامنا کرنا پڑسکتا ہے اور ان کے اپنے بہن بھائیوں سے تعلقات میں گرم جوشی میں بھی کمی پائی جاتی ہے۔ امریکی یونیورسٹی کے پروفیسر جل سوٹر کہنا ہے کہ ایسے افراد جو جذباتی طور پر اپنی ماں کے زیادہ قریب ہوتے ہیں انہیں اس کی قیمت بھی ادا کرنا پڑتی ہے۔

یونیورسٹی میں کی گئی تحقیق میں یہ بات سامنے آئی ہے کہ مستقبل میں ایسے بچوں میں ڈپریشن کی علامات زیادہ دیکھی گئی ہیں ۔ ماہرین کا کہنا ہے کہ ایسی صورتحال کی وجہ سے خصوصی توجہ کے حامل بچوں کو مشکل میں زیادہ مشکلات کا سامنا کرنا پڑتا ہے اور وقت گزرنے کے ساتھ ان کی ٹینشن میں اضافہ بھی ہوسکتا ہے۔

تحقیق کے دوران بچوں سمیت 49 سال کی عمر تک کے 725 افراد کا جائزہ لیا گیا جس میں ان کے اور والدین کے درمیان جذباتی وابستگی، گھریلو تنازعات، فخر اور محرومی کے احساسات پر غور کیا گیا۔ تحقیق میں یہ بات بھی سامنے آئی کہ وہ نوجوان جو یہ احساس رکھتے ہیں کہ پرورش کے دوران ان کے ساتھ زیادتی ہوئی ہے اور وہ افراد جو زیادہ لڑائی جھگڑے کرتے ہیں ان میں ذہنی تناؤ کی اور زیادہ علامات پائی جاتی ہیں۔

رپورٹ کے مطابق اپنے والدین کی خصوصی توجہ حاصل کرنے والے بچے بڑے ہوکر اپنے بہن بھائیوں کے مقابلے میں کم حلقہ احباب رکھتے ہیں اور ان کا سماجی حلقہ محدود ہوتا ہے۔ ماہر سماجیات ارابیلا رسل کے مطابق یہ مسائل ازدواجی زندگی پر بھی اثر انداز ہو کرمنفی اثرات ڈالتے ہیں۔ تحقیق کے دوران چند والدین نے ہی بہ مشکل اعتراف کیا کہ ان کے بچوں میں سے کوئی بیٹا یا بیٹی ان کی پسندیدہ اولاد ہے تاہم تحقیق میں سامنے آیا ہے کہ متعدد والدین کی جانب سے ایسا رویہ اپنایا جاتا ہے۔ تحقیق میں ایک اور بات بھی سامنے آئی کہ والدین اس بچے کو زیادہ اہمیت دیتے ہیں جن کی شکل ان سے زیادہ ملتی ہے۔