پرائیویٹ فنڈ مینجمنٹ ریگولیشن 2015متعارف

موجودہ غیربینکاری کمپنیوں کو ایکویٹی کی نئی مقرر کی گئی حد پوری کرنے کے لیے ایک سال کا وقت دیا گیا ہے۔فوٹو: فائل

---

سیکیورٹیز اینڈ ایکسچینج کمیشن آف پاکستان (ایس ای سی پی) نے وفاقی حکومت کی منظوری سے غیر بینکاری مالیاتی کمپنیوں (این بی ایف سیز) کے رولز 2003 میں ترامیم کر دی ہیں۔

اس ضمن میں ایس ای سی پی کی جانب سے جاری کردہ اعلامیے کے مطابق ایس ای سی پی نے غیر بینکاری مالیاتی کمپنیوں کے ضوابط جاری کردہ 2008 میں ترامیم کرتے ہوئے پرائیویٹ فنڈ مینجمنٹ ریگولیشن2015 متعارف کرا دیے ہیں، غیر بینکاری مالیاتی کمپنیوں کے قوائد و ضوابط میں ان ترامیم کا مقصد ان کمپنیوں کے ریگولیٹری فریم ورک کو مزید سہل و آسان بنانا اور سرمایہ کاروں کے سرمائے اور حقوق کے تحفظ کو یقینی بنانا ہے۔

نئے ترمیم شدہ قوائد و ضوابط ایس ای سی پی کی ویب سائٹ میں موجود ہیں۔ غیر مالیاتی بینکاری کمپنیوں کو دو حصوں میں تقسیم کیا گیا ہے جن میں قرض فراہم کرنے والی کمپنیاں اور فنڈ مینجمنٹ کمپنیاں شامل ہیں، ان نئے رولز میں چھوٹے اور درمیانے سائز کی نان ڈپازٹ کمپنیوں کا تصور بھی متعارف کرا دیا گیا ہے جن کے لیے سرمائے کی حد میں نمایاں کمی کر کے صرف 50 لاکھ روپے مقرر کی گئی ہے۔

نئے ریگولیٹری فریم ورک میں غیر بینکاری مالیاتی کمپنیوں کے علاوہ دیگر کمپنیوں کو بھی قرض فراہمی سے متعلقہ کاروباری سرگرمیاں کرنے کی اجازت دی گئی ہے بشرطیہ وہ دی گئی شرائط کو پورا کریں، نئے رولز میں این بی ایف سی کی ایک نئی قسم نان بینک مائیکرو فنانس بھی متعارف کرائی گئی ہے اور غیر بینکاری مائیکرو فنانس کمپنیوں کو کم آمدنی والے افراد کو قرض دینے کے لیے مکمل ریگولیٹری فریم ورک بھی دیا گیا ہے۔

پہلے سے موجود غیر بینکاری مائیکرو فنانس انسٹیٹیوٹشن بھی اسی ریگولیٹری فریم ورک کے تحت ریگولیٹ کیے جائیں گے، نئے قواعد میںبڑے سرمایہ کاروں کے لیے متبادل فنڈز کا تصور بھی دیا گیا ہے اور پرائیویٹ فنڈ مینجمنٹ کے لیے علیحدہ سے فریم ورک دیا گیا ہے، اس کے علاوہ نئے رولز میں ڈپازٹ جمع کرنے والی غیر بینکاری کمپنیوں کے لیے کیپٹل ایڈووکیسی ریشو کا تصور بھی دیا گیا ہے جس میں غیر بینکاری مالیاتی کمپنیوں کے ڈپازٹ لینے کو کمپنی کی ایکویٹی، کریڈٹ ریٹنگ اور کیپٹل ایڈوکیسی سے مشروط کر دیا گیا ہے۔

موجودہ غیربینکاری کمپنیوں کو ایکویٹی کی نئی مقرر کی گئی حد پوری کرنے کے لیے ایک سال کا وقت دیا گیا ہے، فنڈ مینجمنٹ کے حوالے سے ایسٹ مینجمنٹ کمپنیوں کودیگر فنڈ مینجمنٹ کی سرگرمیوں کی بھی اجازت دے دی گئی ہے، میوچل فنڈز انڈسٹری کے لیے مینجمنٹ فیس میں کمی کر دی گئی ہے اور فنڈز سے متعلقہ اخراجات کو کم سے کم رکھنے کیلیے حد مقرر کر دی گئی ہے جس سے سرمایہ کاروں کے منافع میں اضافہ ہو گا۔