محمد عامر کو ٹیم میں شامل کرنے پرغورکررہے ہیں شہریار خان

پاک بھارت کرکٹ سیریز کیلئے مثبت اشارے مل رہے ہیں اوراس حوالے سے ایک دو روز میں آگاہ کردیا جائے گا،چیئرمین پی سی بی. فوٹو:ایکسپریس نیوز/فائل

---

پاکستان کرکٹ بورڈ کے چیئرمین شہریار خان کا کہنا ہے کہ فاسٹ بولر محمد عامر اپنی پرفارمنس سے ٹیم میں واپسی کا دروازہ کھٹکھٹا رہے ہیں جسے دیکھتے ہوئے انہیں ٹیم میں شامل کرنے پر غور شروع کردیا گیا ہے۔

لاہور میں میڈیا سے بات کرتے ہوئے شہریار خان کا کہنا تھا کہ محمد عامر کی ڈومسٹک پرفارمنس دیکھتے ہوئے لگ رہا ہے کہ وہ ٹیم میں واپسی کا دروازہ کھٹکھٹا رہے ہیں اسی لئے انہیں ٹیم میں شامل کرنے پرغورشروع کردیا گیا ہے تاہم اگرمحمد عامرکوکھلانے کا فیصلہ ہوا تو سلیکشن کمیٹی کی اجازت لینا ہوگی۔ انہوں نے کہا کہ محمد عامر کو ٹیم میں شامل کرنے کے لئے سینئرز کھلاڑیوں کو بھی سمجھانا ہوگا کہ وہ اپنے رویئے میں انکساری پیدا کریں جب کہ انہیں کھلانے پر چند پیچیدگیاں بھی ہیں جنہیں جلد دور کرنے کی کوشش کریں گے۔

چئیرمین پی سی بی کا کہنا تھا کہ پاک بھارت کرکٹ سیریز کے لئے مثبت اشارے مل رہے ہیں تاہم اس حوالے سے بھارتی بورڈ کو صاف کہہ دیا کہ سیریز سے متعلق ہاں یا نہ میں جلد آگاہ کیا جائے، دونوں ٹیموں کے درمیان اگرسیریزہونا ہے تو اس میں صرف 11 دن رہ گئے اور اس دوران بہت زیادہ انتظامات کرنا ہوں گے اس لئے یقین ہے کہ ایک دو دن میں اس حوالے سے آگاہ کردیا جائے گا۔ ان کا کہنا ہے کہ ہمارا شروع سے موقف ہے کہ کرکٹ اور سیاست کو اکٹھا نہ کیا جائے اورکرکٹ کو سیاست سے دور ہی رکھا جائے جب کہ بھارتی حکام کا کہنا ہے کہ دوطرفہ سیریز سے متعلق وزیراعظم نریندر مودی سے بات کریں گے۔

انگلینڈ کے خلاف ون ڈے اور ٹی ٹوئنٹی میں شکست پر شہریار خان کا کہنا تھا کہ بعض کھلاڑی ان فٹ تھے اس لئے مطلوبہ نتائج حاصل نہ کرسکے، سلیکشن کمیٹی اور کوچ نے ٹیم کی بہتری کے لئے فیصلے کئے، بعض اوقات تجربات کامیاب ہوتے ہیں اور کبھی ناکام تاہم اب تجربات نہیں ٹیم بنانے کی ضرورت ہے تاکہ بھارت سے سیریز کی صورت میں ایک مستقل ٹیم کھلائی جائے جو ٹی ٹوئنٹی ورلڈ کپ میں بھی پاکستان کی نمائندگی کرے۔