بلوچستان میں تعمیر و ترقی کا سفر شروع

سی پیک کے تحت گوادر بندر گاہ کی تعمیر اور جدید ائر پورٹ کے قیام سے اس صوبے کی ترقی اور خوشحالی کے ایک نئے دور کا آغاز ہو گا ۔ فوٹو؛ فائل

---

صدر مملکت ممنون حسین نے کہا ہے کہ حکومت بلوچستان کی ترقی اور خوشحالی کے لیے پرعزم ہے اور اسے دیگر صوبوں کے برابر لانے میں کوئی دقیقہ فروگزاشت نہیں رکھا جائے گا، بڑے ترقیاتی منصوبے بالخصوص پاک چین اقتصادی راہداری (سی پیک) بلوچستان کی ترقی اور خوشحالی کی منازل طے کرانے میں اہم کردار ادا کرینگے۔ صدر مملکت نے ان خیالات کا اظہار گورنر بلوچستان محمد خان اچکزئی سے ملاقات کے دوران گفتگو میں کیا اور بتایا کہ سی پیک کے تحت گوادر پورٹ اور گوادر ایئر پورٹ تعمیر کیا جا رہا ہے۔

جس سے بلوچستان کے عوام کے لیے روزگار کے بے پناہ مواقع پیدا ہوں گے اور ان کا معیار زندگی بلند ہو گا۔ پاکستان کے رقبے کے اعتبار سے سے بڑے صوبے بلوچستان کا سب سے بڑا مسئلہ ہی اس کی پسماندگی اور بیروزگاری ہے۔ اب صدر مملکت نے یقین دہانی کرائی ہے کہ سی پیک کے تحت گوادر بندر گاہ کی تعمیر اور جدید ائر پورٹ کے قیام سے اس صوبے کی ترقی اور خوشحالی کے ایک نئے دور کا آغاز ہو گا ۔

جس سے بلوچستان کی تمام محرومیوں کا مداوا ہو جائے گا۔ قوم کی دعا ہے کہ رب العزت صدر مملکت کے امید افزا خیالات کو مستجاب فرمائے اور اس صوبے کے خلاف دشمنوں کے جو مذموم مقاصد اور ریشہ دوانیاں ہیں وہ کبھی پورے نہ ہو سکیں اور بلوچستان بھی اپنی تعمیر و ترقی کے حوالے سے ملک کے دیگر صوبوں کے لیے باعث رشک بن جائے۔ بلوچستان کی وسیع و عریض سر زمین کے نیچے قدرت کے جو خزانے چھپے ہوئے ہیں وہاں پر قیام امن کے بعد ان سے مستفید ہونے کے جو مواقع پیدا ہوں گے وہ مملکت خدا داد کو دنیا کے قابل فخر ممالک کی صف میں کھڑا کر دیں گے۔