جشن آزادی اخلاقی اقدار ملحوظ خاطر رکھی جائیں

آج کے پاکستان میں مسائل بھی اور اندرونی و بیرونی مشکلات بھی، لیکن ان سب کا مقابلہ ہم سب کو مل کر کرنا ہے۔ فوٹو: پی پی آئی

---

یوم آزادی منانا زندہ قوموں کی نشانی ہے، 14 اگست کو ملک بھر میں پاکستان کا 70 واں یوم آزادی قومی جوش و جذبے سے منایا گیا، جشن آزادی کی ملک گیر تقریبات میں تحریک آزادی کی یادوں کو تازہ کیا گیا اور قائداعظم سمیت دیگر شخصیات کی انتھک کوششوں پر روشنی ڈالی گئی۔ ہر طرف قومی پرچموں کی بہار رہی اور ہر دل خوشی سے بھرا رہا۔ قوم نے جشن آزادی کی تیاری ماہ اگست کی ابتدا سے ہی کر رکھی تھے اور 13 اگست ہفتے کی رات نوجوان اور فیملیز شہر کی سجاوٹ دیکھنے سڑکوں پر نکل آئے۔

یہاں یہ امر توجہ طلب ہے کہ شہریوں کی بڑی تعداد کا یوں سڑکوں پر آجانا ٹریفک جام اور دیگر مسائل کا باعث بنتا ہے جس کے لیے باقاعدہ پلاننگ کی ضرورت ہے لیکن انتظامیہ کی جانب سے ہر سال کی طرح لاپرواہی برتی گئی جس کے نتیجے میں مختلف شہروں میں ٹریفک جام کی بدترین صورتحال کا سامنا کرنا پڑا، گاڑیوں کے دھویں کے باعث کئی افراد کی حالت بگڑ گئی۔ نیز جشن آزادی مناتے ہوئے اخلاقی اقدار کو ملحوظ خاطر رکھنے کی بھی ضرورت ہے، یوم آزادی پر ہوائی فائرنگ کے نتیجے میں کئی اموات واقع ہوئیں۔ نوجوانوں کو اس بات کا ادراک ہونا چاہیے کہ آپ کے جشن آزادی منانے کے طریقہ قوم کے شایان شان ہو کیونکہ ہماری اخلاقی اقدار ہی دیگر اقوام کے مقابلے میں ہمیں ممتاز کرتی ہیں۔

سڑکوں پر بغیر سائلنسر، ہوٹر والے سائرن کے ساتھ تیز رفتاری بائیک چلانے اور ون ویلنگ کا مظاہرہ کرنے کو کسی طور مستحسن اقدام قرار نہیں دیا جاسکتا۔ اس سال اسلام آباد اور لاہور میں ون ویلنگ پر کسی قدر کنٹرول رکھا گیا اور خلاف ورزی کرنے والے درجنوں افراد کو حراست میں بھی لیا گیا لیکن کراچی میں نوجوانوں نے ہلڑ بازی اور ون ویلنگ سے دیگر محب وطن پاکستانیوں کا جشن پراگندہ کیا۔

علاوہ ازیں سڑکوں اور چوراہوں کو جشن مناتے ہوئے مکمل بند کردینے کی روایت کا بھی خاتمہ ہونا چاہیے کیونکہ اس حالت میں نہ صرف ٹریفک جام بلکہ ایمبولینس میں پھنسے مریضوں کو بھی مشکلات کا سامنا کرنا پڑتا ہے۔ 14 اگست اس عہد کی تجدید کا دن ہے کہ ہم یکجان ہوکر وطن عزیز کی سلامتی کے لیے وہ قربانی دیں جو اس کے وقار کا تقاضا ہو، آزادی ایک نعمت ہے ہمیں اس کی قدر کرنی چاہیے اور متحد ہوکر ملک و قومی کی ترقی اور سالمیت کے لیے کام کرنا ہوگا۔ یہ بھی ایک حقیقت ہے کہ آج کے پاکستان میں مسائل بھی اور اندرونی و بیرونی مشکلات بھی، لیکن ان سب کا مقابلہ ہم سب کو مل کر کرنا ہے تب ہی ہم بانی پاکستان قائداعظم محمد علی جناح کے نظریات و افکار کے تحت پاکستان کی تشکیل کرپائیں گے۔