سندھ کو90 فیصد کما کردینے والا کراچی پیپلزپارٹی کیلئے سوتیلا ہےایم کیوایم پاکستان

افسوس کی بات ہے کہ پیپلز پارٹی نے بلدیاتی اداروں کو فنڈز تک ادا نہیں کئے،ایم کیوایم پاکستان فوٹو: فائل

---

MULTAN/ ISLAMABAD: ایم کیو ایم پاکستان نے پیپلز پارٹی کی جانب سے تنقید کا جواب دیتے ہوئے کہا کہ پیپلز پارٹی پریس کانفرنس میں ہم پر تنقید کے بجائے اپنے عمل سے جواب دے کہ انہوں نے کراچی کے لئے کیا گیا جب کہ یہ شہر سندھ کو 90 فیصد کماکردینے کے باوجود پیپلزپارٹی کے لئے سوتیلا ہے۔

پیپلز پارٹی کے سینیٹر سعید غنی کی جانب سے لگائے گئے الزامات کے جواب میں ڈپٹی میئر کراچی ارشد وہرا کے ہمراہ پریس کانفرنس کرتے ہوئے ایم کیو ایم پاکستان کے رہنما فیصل سبزواری کا کہنا تھا کہ کیسی شرمناک بات ہے کہ پیپلز پارٹی حکومت میں ہونے کے باوجود ہم پر الزام تراشی کر رہی ہے، 9 سال تک بلا شرکت غیرے سندھ میں حکومت کرنے والی پیپلز پارٹی نے کراچی سے پیسہ خیر پور منتقل کیا، 9 ارب روپے خرچ کرنے کے باوجود ایک یوسی بھی ٹھیک سے نہیں بنا سکے۔

اس خبر کو بھی پڑھیں: پارکس، گراؤنڈ اور نالوں پر قبضہ کرنا ایم کیو ایم کاریکارڈ رہا ہے، پیپلزپارٹی

فیصل سبز واری کا کہنا تھا کہ 100 روزہ مہم کے دوران کراچی شہر سے 8 سال کا گند صاف کرنے کی کوشش کی اور لاکھوں ٹن کچرا اٹھایا گیا، اس کے علاوہ لاکھوں ٹن اسکوائر فٹ سڑکوں کی مرمت کی گئی لیکن افسوس کی بات ہے کہ پیپلز پارٹی نے بلدیاتی اداروں کو فنڈز تک ادا نہیں کیے۔ انہوں نے کہا کہ کراچی پورے سندھ کو90 فیصد سے زائد کما کر دیتا ہے لیکن پیپلز پارٹی کے لئے یہ شہر سوتیلا ہے، پیپلز پارٹی نے شہر کی ایک گلی تک پکی نہیں کی، لیاری پیپلز پارٹی کا گڑھ رہا اور پیپلز پارٹی نے لیاری کی عوام کو گینگ وار کا تحفہ دیا، جہاں کے لوگوں نے ذوالفقاربھٹو کو پوجا، یہ حکومت اسے پانی، بجلی، گیس تک نہ دے پائی۔

ایم کیو ایم رہنما کا کہنا تھا کہ ہم نے پیپلز پارٹی کی طرح نوکریاں نہیں بیچیں، پیپلز پارٹی کے سینیر وزیر پر نوکریاں بیچنے کا مقدمہ چل رہا ہے، عدلیہ سندھ حکومت چلا رہی ہے جب کہ پیپلز پارٹی نیب پر اثر ورسوخ استعمال کرتی ہے۔