سابق سری لنکن اسپنر مرلی دھرن آئی سی سی ہال آف فیم کا حصہ بن گئے

مرلی دھرن نے 1993 سے لے کر 2011 تک کے دوران سری لنکا کی جانب سے 133 ٹیسٹ اور 350 ایک روزہ میچز کھیلے۔ فوٹو: فائل

---

ٹیسٹ کرکٹ کے کامیاب ترین بولر سابق سری لنکن اسٹار مرلی دھرن کو جمعرات کے روز آئی سی سی کے ہال آف فیم میں شامل کر لیا گیا۔

جمعرات کو سری لنکا اور بھارت کے درمیان آئی سی سی چیمپیئنز ٹرافی کے میچ کی اننگز بریک کے دوران لندن میں تقریب میں مرلی دھرن کو یہ اعزاز دیا گیا۔مرلی دھرن ٹیسٹ کرکٹ کی تاریخ کے وہ واحد بولر ہیں جنھوں نے 800 وکٹیں حاصل کیں۔ یہی نہیں، مرلی دھرن ایک روزہ میچز میں بھی کامیاب ترین بولر تھے اور انھوں نے ون ڈے کرکٹ میں 534 وکٹیں لیں۔ مرلی دھرن سری لنکا کی جانب سے پہلے کرکٹر ہیں جنھیں آئی سی سی ہال آف فیم میں شامل کیا گیا ہے۔

لندن میں تقریب کے دوران آئی سی سی کے چیف ایگزیکٹیو ڈیوڈ رچرڈسن نے انھیں ایک اعزازی کیپ دی ، اس موقع پر مرلی دھرن کا کہنا تھا کہ 'یہ میرے لیے انتہائی فخر اور اعزاز کی بات ہے، خاص کر آئی سی سی کی جانب سے جو کہ کسی بھی کرکٹر کی سب سے بڑی خواہش ہو سکتی ہے۔ میں آئی سی سی کا اس موقع پر شکریہ ادا کرتا ہوں اور میں اسے زندگی بھر نہیں بھولوں گا۔

یاد رہے کہ مرلی دھرن نے 1993 سے لے کر 2011 تک کے دوران سری لنکا کی جانب سے 133 ٹیسٹ اور 350 ایک روزہ میچز کھیلے۔ ٹیسٹ کرکٹ میں انھوں نے 67 بار ایک ہی میچ میں پانچ وکٹیں اور 22 مرتبہ 10 وکٹیں حاصل کیں، وہ سری لنکا کی اس ٹیم کا بھی حصہ تھے جس نے ارجنا رانا ٹنگا کی قیادت میں 1996 میں لاہور کے قذافی اسٹیڈیم میں آئی سی سی ورلڈ کپ جیتا تھا۔