جلسہ تقسیم اسناد جامعہ کراچی میں میڈیکل کالج اور چینی لینگویج سینٹر قائم ہوگا

جامعہ کراچی کے سالانہ کانووکیشن کے اختتام پر طلبہ وطالبات روایتی انداز میںکانووکشن کیپ کو فضا میںاچھال رہی ہیں۔ فوٹو: ایکسپریس

---

جامعہ کراچی کا 23 واں سالانہ جلسہ تقسیم اسناد بدھ کوولیکاگرائونڈ کراچی یونیورسٹی میں منعقد ہوا۔

جلسہ تقسیم اسناد میں مجموعی طورپر771طلبہ وطالبات نے بی ایس آنرز، ماسٹر، ڈاکٹریٹ اور ایم فل کی اسناد حاصل کیں اسنادحاصل کرنے والوں میں 182نے ڈاکٹریٹ اور 101 ایم فل کرنے والے طلبا بھی شامل تھے جبکہ 155 طلبہ و طالبات کوگولڈ میڈل تفویض کیے گئے جس میں ایوننگ پروگرام کے طلبا بھی شامل تھے واضح رہے کہ ماضی میں محض ان شعبوں میں پہلی پوزیشن حاصل کرنے والے طلبا کوگولڈ میڈل دیے جاتے تھے۔

جہاں اسپانسر موجود ہو تاہم شیخ الجامعہ کی ہدایت پراس سال بی ایس ،آنرز اور ماسٹرز میں پہلی پوزیشن حاصل کرنے والے تمام طلبا کوگولڈ میڈل دیے گئے، جلسہ تقسیم اسناد کی صدارت کرتے ہوئے جامعہ کراچی کے وائس چانسلر پروفیسرڈاکٹرمحمدقیصرنے یونیورسٹی میں پہلے میڈیکل کالج اور''چینی لینگویج سینٹر''کے قیام کابھی اعلان کیا شیخ الجامعہ نے بتایاکہ جامعہ کراچی نے 1958سے 2012تک کلیہ فنون، علوم ،ادویات،اسلامیات، قانون ،نظم وانتظامی اموراور تجارت میں ڈاکٹریٹ کی 1784 اسناد عطاکی ہیں جبکہ ایک سال کی قلیل مدت میں جامعہ کراچی نے سال 2012 میں 182پی ایچ ڈی کی اسناد جاری کیں جامعہ کراچی نے 2007 سے 2012 تک2115 مقالات شائع کیے۔



یہ مقالات تھامسن ریوٹرز، آئی ایس آئی ویب نالج نے اپنی فہرست میں شائع کیے ہیں اس کے علاوہ جامعہ کراچی کویہ اعزاز حاصل ہے کہ سائنسی ریسرچ میں 60 پیٹنٹس قومی اور بین الاقوامی سطح پرمنظورہوئے ہیں انھوں نے کہا کہ اس وقت جامعہ کو جو اہم مسئلہ درپیش ہے وہ مالی مشکلات ہیں ہم نے پہلی المنائی ایسوسی ایشن جامعاتی سطح پرقائم کی ہے جس کی مدد سے تمام المنائی ایک دوسرے کے قریب آسکیں گے اوراس کے نتیجے میں جامعہ ایک انڈائومنٹ فنڈ قائم کرنے میں کامیاب ہوجائے گی انھوں نے جلسہ تقسیم اسناد میں یونیورسٹی کے تمام المنائی کودعوت دی کہ وہ اس المنائی نیٹ ورک میں شامل ہوں اورمادرعلمی کے قریب ہوتے جائیں.

شیخ الجامعہ نے کہاکہ جامعہ کراچی پاکستان کی اعلیٰ ترین درسگاہ ہونے کے اعزاز کے علاوہ دنیا کی بہترین جامعات کی صف میں بھی ایک نمایاں مقام رکھتی ہے اہل علم ودانش جانتے ہیں کہ ٹائمز ایجوکیشن اور برطانیہ کے ادارے کیوایس کے تحت جامعہ کراچی کا شمار دنیا کی بہترین 700جامعات میں کیا گیا ہے اس اعزاز میں فنون ،سماجی علوم اور حیاتیاتی علوم کے کئی مضامین شامل ہیں مزید باعث مسرت بات یہ ہے کہ QS ایشین جامعات کی رینکنگ میں جامعہ کراچی 425 نمایاں یونیورسٹیز میں 191نمبر پر فائز ہے جوہمارے اساتذہ کی شب وروز تدریس وتحقیق کاثمرہے۔