جنوبی پنجاب کا منصوبہ پیپلزپارٹی کا سیاسی ڈرامہ ہے اسحاق ڈار

ہم الیکشن کمیشن کی مضبوطی اور کراچی میں ٹارگٹ کلنگ کیخلاف کل پارلیمنٹ کے سامنے سٹ ان کر رہے ہیں, اسحاق ڈار. فوٹو: فائل

---

سینیٹ میں قائد حزب اختلاف اور مسلم لیگ (ن) کے مرکزی رہنما اسحاق ڈار نے کہا ہے کہ بہاولپور جنوبی پنجاب کا منصوبہ پیپلزپارٹی کا سیاسی ڈرامہ ہے جو ضرور فلاپ ہو گا۔

لیبارٹری اور بلڈ بنک کی نئی عمارت کے افتتاح کے بعد میڈیا سے گفتگو کرتے ہوئے سینیٹر اسحاق ڈار نے کہا کہ نگراں سیٹ اپ طویل ہونے کی باتیں صرف افواہ ساز پھیلا رہے ہیں عوام تھوڑا انتطار کریں ساری صورتحال واضح ہو جائے گی، ان کا کہنا تھا کہ پیپلزپارٹی نے نئے صوبے کا بل ایوان میں پیش کیا تو ہم اپنا بل لائیں گے جس میں پروفیشنل انداز میں نئے صوبے کے تمام تر معاملات طے کئے ہونگے جب کہ پیپلزپارٹی کے بنائے ہوئے کمیشن نے اس انداز میں کوئی کام نہیں کیا ہمارا مطالبہ ہے کہ نئے صوبوں کے معاملے پر بھارت کی طرح کمیشن بنایا جائے۔

اسحاق ڈار نے کہا کہ نگران وزیراعظم کے لئے پیپلزپارٹی امپورٹڈ شخصیت سے اتفاق رائے کرے گی تو وہ اس کا مسئلہ ہے، قائد ایوان اور قومی اسمبلی کے قائد حزب اختلاف ہی آئینی طور پر مشاورت کے پابند ہیں، انہوں نے کہا کہ الیکشن کمیشن کے اراکین کو آئنی عمل کے بغیر نہیں ہٹایا جا سکتا اسی لئے ہم الیکشن کمیشن کی مضبوطی اور کراچی میں ٹارگٹ کلنگ کیخلاف کل پارلیمنٹ کے سامنے سٹ ان کر رہے ہیں جسے نجانے کیوں دھرنے کا نام دیا جا رہا ہے۔