لندن میں وزیراعظم کی نواز شریف سے ملاقات، اہم معاملات پر مشاورت

لندن: وزیراعظم شاہد خاقان عباسی اور سابق وزیراعظم نواز شریف کے درمیان ملاقات میں اہم معاملات پر مشاورت ہوئی ہے۔

ایکسپریس نیوز کے مطابق لندن میں سابق وزیراعظم نواز شریف کے چھوٹے صاحبزادے حسن نواز کے دفتر میں مسلم لیگ (ن) کے رہنماؤں کی ملاقات ہوئی جس میں نواز شریف کے علاوہ وزیراعظم شاہد خاقان عباسی، وزیر خزانہ اسحاق ڈار اور نواز شریف کے بڑے صاحبزادے حسین نواز بھی موجود تھے۔

ذرائع کا کہنا ہے کہ ملاقات کے دوران نواز شریف نے شاہد خاقان عباسی کو مستقبل کے حوالے سے اپنے آئندہ لائحہ عمل سے آگاہ کیا جب کہ اس موقع پر وزیراعظم نے کہا کہ این اے 120 کے ضمنی انتخاب میں جمہوریت کی جیت ہوئی ہے۔

واضح رہے کہ نواز شریف اپنی اہلیہ کی علالت کے باعث لندن میں موجود ہیں جب کہ شاہد خاقان عباسی اقوام متحدہ کی جنرل اسمبلی کے سالانہ اجلاس میں شرکت کے بعد لندن پہنچے ہیں۔