ڈونلڈ ٹرمپ نے ہیلری کلنٹن کو شیطان قرار دے دیا

واشنگٹن: امریکا میں جیسے جیسے صدارتی انتخابات قریب آرہے ہیں دونوں جماعتوں کے نامزد امیدواروں ہیلری کلنٹن اور ڈونلڈ ٹرمپ کے درمیان ایک دوسرے پر الزام لگانے کا سلسلہ بھی تیز ہوگیا ہے جس کی تازہ مثال ڈونلڈ ٹرمپ کا تازہ بیان ہے جس میں انہوں نے اپنی سیاسی مخالف کو شیطان قرار دے دیا ہے۔

غیر ملکی خبر رساں ادارے کے مطابق امریکی ریاست پینسلوینیا کے ایک ہائی سکول میں ریلی سے خطاب کرتے ہوئے ڈونلڈ ٹرمپ نے ڈیموکریٹک پارٹی کی نامزد صدارتی امیدوار ہیلری کلنٹن کو شیطان قرار دے دیا ہے۔ ڈونلڈ ٹرمپ کا ہیلری کلنٹن کے علاوہ ڈیمو کریٹک کے ایک اور رہنما برنی سینڈرز کو بھی تنقید کا نشانہ بناتے ہوئے کہنا تھا کہ سینڈرز نے ہارنے کے باوجود ہیلری کلنٹن کی حمایت کا اعلان کرکے واضح کردیا کہ وہ شیطان ہے اور ایک معاہدے کے تحت شیطان کا ساتھ دے رہا ہے۔

دوسری جانب ہیلری کلنٹن نے بھی اپنے ایک انٹرویو میں ڈونلڈ ٹرمپ کو شدید تنقید کا نشانہ بنایا ہے۔ اپنے ایک انٹرویو میں انہوں نے کہا ہے کہ ٹرمپ کو امریکی اقدار کے بارے میں ’مکمل طور پر غلط فہمی‘ ہے اور انہوں نے امریکی معاشرے میں تقسیم پیدا کرنے کی کوشش کی ہے۔

عراق میں ہلاک ہونے والے پاکستانی نژاد امریکی فوجی افسر کے والدین کا مذاق اڑانے پر ڈونلڈ ٹرمپ کو مخالفین کے علاوہ ان کی اپنی جماعت کے رہنماؤں کی جانب سے بھی شدید تنقید کا نشانہ بنایا جارہا ہے۔ جس کے بعد وہ عوامی سطح پر بھی اپنی مقبولیت کھو رہے ہیں ، تازہ ترین جائزے کے مطابق ہیلری کلنٹن کو ڈونلڈ ٹرمپ پر برتری مزید بڑھ گئی ہے، اس وقت ہیلری کلنٹن کو 46 جب کہ ٹرمپ کو 39 فیصد لوگوں کی حمایت حاصل ہے۔

واضح رہے کہ ڈونلڈ ٹرمپ نے چند روز قبل امریکی مسلم فوجی کیپٹن ہمایوں خان کی والدہ کا مذاق اڑایا تھا جس پر انہیں شدید تنقید کا نشانہ بنایا جارہا ہے۔