عرفان خان کی حالت تشویشناک، ڈاکٹرز نے ایک ماہ کا وقت دیدیا

ویب ڈیسک  بدھ 11 اپريل 2018
عرفان خان کینسر کی آخری اسٹیج پر ہیں، بھارتی صحافی کا دعویٰ -  فوٹو:فائل

عرفان خان کینسر کی آخری اسٹیج پر ہیں، بھارتی صحافی کا دعویٰ - فوٹو:فائل

ممبئی: بالی ووڈ کے باصلاحیت اداکار عرفان خان کے قریبی ذرائع کا کہنا ہے کہ کینسر کے مرض میں مبتلا اداکار کی حالت انتہائی تشویشناک ہے۔ 

بالی ووڈ کے ساتھ ہالی ووڈ میں بھی بہترین اداکاری کے جوہر دکھانے والے بھارتی فلم انڈسٹری کے باصلاحیت اداکار عرفان خان  نے گزشتہ ماہ افسوسناک خبر سناتے ہوئے کہا تھا کہ وہ نیورو اینڈو کرائن کینسر نامی موذی مرض میں مبتلا ہیں تاہم ان کی بیماری ابھی ابتدائی مرحلے میں ہے۔

بعد ازاں عرفان خان علاج کی غرض سے بیرون ملک چلے گئے تھے جہاں ان کا علاج جاری ہے لیکن بھارتی صحافی عمیر سندھو نے انکشاف کیا ہے کہ عرفان خان کی طبیعت مسلسل بگڑ رہی ہے اور وہ صحت یابی کی جانب جانے کے بجائے مزید بیمار ہوتے جارہے ہیں۔

اس خبرکوبھی پڑھیں: عرفان خان کینسر میں مبتلا

عمیر سندھو نے اداکار عرفان خان کے انتہائی قریبی ذرائع اور ان کے گھر والوں کی وساطت سے ٹوئٹ کرتے ہوئے کہا ’’عرفان خان کینسر کی ابتدائی نہیں بلکہ آخری اسٹیج پر ہیں جب کہ ڈاکٹرز کا خیال ہے کہ وہ ایک ماہ سے زیادہ عرصے تک زندہ نہیں رہیں گے‘‘۔

صحافی عمیر سندھو کی جانب سے خبر پوسٹ کرنے کے چند گھنٹوں بعد ہی یہ ٹوئٹ ہٹادی گئی تھی لیکن اس وقت تک یہ خبر جنگل کی آگ کی طرح پھیل چکی تھی۔

اس خبرکوبھی پڑھیں: عرفان خان کی بیوی پھٹ پڑیں

واضح رہے کہ عرفان خان کو بالی ووڈ میں بہترین اداکاری پر پدماشری، نیشنل اور  فلم فیئر ایوارڈ سمیت متعدد ایوارڈز سے نوازا جا چکا ہے اور وہ ہالی ووڈ کی کامیاب ترین فلموں ’’جراسک ورلڈ‘‘ اور ’’لائف آف پائی‘‘ میں بھی اپنی صلاحیتوں کا لوہا منواچکے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔