پاکستان ساف فٹبال 2020 کی میزبانی کرے گا

آئندہ برس انڈر15،2021 میں گرلز انڈر19 ایونٹ کا میلہ سجایا جائے گا۔

Sports Reporter April 12, 2018

خادم علی شاہ مسلسل تیسری بار ایشین باڈی کے نائب صدر بن گئے۔ فوٹوفائل

FAISALABAD: پاکستان2020 میں ساف فٹبال چیمپئن شپ کی میزبانی کرے گا جب کہ آئندہ برس انڈر15 ساؤتھ ایشین فٹبال چیمپئن شپ کا انعقاد بھی ملکی میدانوں میں ہوگا۔

پاکستان 2020 میں ساف فٹبال چیمپئن شپ کی میزبانی کریگا، پاکستان فٹبال فیڈریشن کے آفیشل نے بدھ کو میڈیا سے گفتگو میں اس کی تصدیق کردی،کرکٹ اور ہاکی کے بعد فٹبال کے عالمی مقابلے بھی پاکستان میں منعقد ہونے جارہے ہیں۔

فیفا کی جانب سے پاکستان فٹبال فیڈریشن کی ممبرشپ بحال ہونے کے بعد موجودہ عہدیدار ملک میں انٹرنیشنل فٹبال کے انعقاد کو ممکن بنانے کیلیے ہمہ وقت کوشاں ہیں، ساؤتھ ایشین فٹبال فیڈریشن ( ساف ) نے 2019 سے 2021 تک پاکستان کو تین علاقائی ایونٹس کی میزبانی سونپنے کا فیصلہ کیا ہے۔

پی ایف ایف آفیشل کے مطابق گزشتہ دنوں ڈھاکا میں منعقدہ ساؤتھ ایشین فٹبال فیڈریشن کی کانگریس میں پاکستان کو 2020 کی ساؤتھ ایشین فٹبال چیمپئن شپ کی میزبانی دیے جانے کی منظوری بھی دے دی گئی ہے۔

آفیشل نے مزید بتایا کہ پاکستان اس کے علاوہ آئندہ برس ساؤتھ ایشین انڈر15 فٹبال چیمپئن شپ کی میزبانی بھی کرے گاجبکہ ساف انڈر19 گرلز چیمپئن شپ بھی 2021 میں پاکستانی میدانوں پر منعقد ہوگی۔

پاکستان فٹبال فیڈریشن کے صدر فیصل صالح حیات نے ان فیصلوں کا خیرمقدم کرتے ہوئے کہا کہ فیفا کی جانب سے بحالی کے بعد یہ پی ایف ایف کی بڑی کامیابی ہے۔ انھوں نے مزید کہا کہ پاکستان کا مشکل دور ختم ہوگیا،اب ملک میں دوبارہ انٹرنیشنل فٹبال سرگرمیاں شروع ہوجائیں گی۔

واضح رہے کہ رواں ماہ کراچی میں نیشنل چیلنج کپ بھی شروع ہونے جارہا ہے، دریں اثنا پاکستان کے خادم علی شاہ کو ساؤتھ ایشین فٹبال فیڈریشن نے آئندہ 4 برس کیلیے نائب صدر بھی منتخب کرلیا، وہ مسلسل تیسری بار اس عہدے پر فائز ہوئے۔