اکشے کمار شوٹنگ کے دوران شدید زخمی

اکشے کی پسلیوں پر چوٹ آئی ہے، ڈاکٹرز نے انہیں آرام کرنےکا مشورہ دیا ہے

ویب ڈیسک April 20, 2018

فلم ’کیسری‘ اگلے سال ہولی کے موقعے پر ریلیز کی جائے گی ؛فوٹوفائل

بالی ووڈ کے ایکشن ہیرو اکشے کمار نے زخمی حالت میں بھی مسلسل کام کرکے مثال قائم کردی۔

اکشے کمار بالی ووڈ کے ان چند اداکاروں میں سے ہیں جنہیں وقت کا بے حد خیال ہے اور دیگر سپر اسٹارز کی طرح فلم کے سیٹ پر دیر سے پہنچنے کے بجائے مقررہ وقت پر پہنچ جاتے ہیں کئی بار تو ایسا ہوا ہے کہ سیٹ پر اکشے کمار سب سے پہلے پہنچے ہوئے ہوتے ہیں اورباقی عملہ ان کے آنے کے بعد آتا ہے۔ اسی وقت کی پابندی اور کام سے محبت کے باعث اکشے کمار کا شمار آج بھی بالی ووڈ کے صف اول کے اداکاروں میں ہوتا ہے۔ جس کامظاہرہ حال ہی میں دیکھنے میں آیا۔

اکشے کمار ان دنوں فلم''کیسری''کی شوٹنگ میں مصروف ہیں، دوران شوٹنگ ایکشن سین کے دوران اچانک اکشے کمار زخمی ہوگئے۔ میڈیا رپورٹس کے مطابق اکشے کی پسلیوں پر چوٹ آئی ہے، ڈاکٹرز نے انہیں شوٹنگ ختم کرکے آرام کرنے اور ممبئی واپس جانے کا مشورہ دیا ہے لیکن زخمی ہونے کے باوجود اکشے کمار نے شوٹنگ منسوخ کرنے سے منع کردیا اور مسلسل کام کرکے مثال قائم کردی۔

https://twitter.com/DelhiAkkians/status/984468216641536000

واضح رہے کہ 1897 میں سرگڑھی جنگ کے پس منظر میں بنائی گئی فلم'کیسری' کی کہانی برطانوی انڈین آرمی، 21 سکھوں اور افغان اورکزئی قبائلیوں کے درمیان شمال مغربی صوبے کیلئے کی جانے والی لڑائی کے گرد گھومتی ہے۔ فلم میں اکشے کمار حوالدار ایشور سنگھ کا کردار نبھارہے ہیں جب کہ ان کے مقابل اداکارہ پرینیتی چوپڑا نظر آئیں گی۔ فلم اگلے سال ہولی کے موقع پر ریلیز کی جائے گی۔