ورلڈ کپ 2019 میں پاکستان مہم کا آغاز ویسٹ انڈیز کے خلاف کرے گا

31مئی کوناٹنگھم میں مقابلہ،آخری لیگ میچ 5 جولائی کوبنگلادیش سے شیڈول۔

Sports Desk April 26, 2018

31مئی کوناٹنگھم میں مقابلہ،آخری لیگ میچ5جولائی کوبنگلہ دیش سے شیڈول۔ فوٹو: فائل

ورلڈ کپ 2019 میں پاکستان اپنی مہم کا آغاز ویسٹ انڈیز کے خلاف کرے گا جب کہ دونوں ٹیمیں31مئی کو ناٹنگھم میں مقابل ہوں گی۔

ورلڈکپ 2019 کے شیڈول کا باقاعدہ اعلان جمعرات کو کیا جائے گا، روبن لیگ فارمیٹ کے تحت ہونے والے میگا ایونٹ میں ہر ٹیم کو دیگرتمام9ٹیموں کے ساتھ ایک ایک میچ کھیلنا ہے، ٹاپ فور کو سیمی فائنل میں جگہ ملے گی۔

ویب سائٹ ''کرک انفو''پر موجود شیڈول کے مطابق پاکستان اپنی مہم کا آغاز 31مئی کو ویسٹ انڈیز کیخلاف ناٹنگھم میں میچ سے کریگا، گرین شرٹس کا دوسرا مقابلہ 3جون کو میزبان انگلینڈ کیخلاف اسی وینیو پر ہونا ہے۔

پاکستانی ٹیم 7 جون کو برسٹل میں سری لنکا کے چیلنج کا سامنا کریگی،ٹاوئنٹن میں12 جون کو آسٹریلیا کے مقابل ہونا ہے،پاک بھارت ٹاکرا 16 جون کو مانچسٹر میں ہوگا،گرین شرٹس 23 تاریخ کو لارڈز میں جنوبی افریقہ کیخلاف برتری کی جنگ لڑیںگے،نیوزی لینڈ سے میچ 26 جون کو برمنگھم میں شائقین کی توجہ کا مرکز بنے گا، 29تاریخ کو افغانستان کیساتھ میچ لیڈز میں ہوگا۔

پاکستان لیگ مرحلے کا آخری میچ 5 جولائی کو بنگلادیش کیخلاف کھیلے گا۔ اگر پیش قدمی جاری رہی تو پہلا سیمی فائنل9اور دوسرا 11کو ہوگا، گرین شرٹس کے 3میچز جمعہ جبکہ بھارت سمیت 2 مقابلے اتوار کو شیڈول کیے گئے ہیں۔

یاد رہے کہ ویسٹ انڈیز اور افغانستان کی ٹیمیں کوالیفائرز کے ذریعے جبکہ دیگر رینکنگ کی بنیاد پر ورلڈکپ تک رسائی میں کامیاب ہوئی ہیں۔