پریزائیڈنگ افسر10مئی کو پولنگ اسٹیشنوں کا انتظام سنبھال لیں الیکشن کمیشن

الیکٹرانک پرچی کی سہولت صرف ہمارے ملک میں ہے، بیلٹ پیپرز چوری ہونے کا امکان نہیں، اساتذہ الیکشن ڈیوٹی کیلیے راضی ہوگئے ، سیکریٹری فوٹو ایکسپریس / فائل

---

الیکشن کمیشن نے ملک بھر کے تمام پریزائیڈنگ افسران کوہدایت کی ہے کہ وہ 10 مئی کو پولنگ اسٹیشنوں کا کنٹرول سنبھال لیں، دوسری جانب امیدواروں کو ہدایت کی گئی ہے کہ الیکشن مہم جمعرات کو ختم کردی جائے۔

پیر کو الیکشن کمیشن کی جانب سے جاری ہدایت کے مطابق تمام پریذائیڈنگ افسران سے کہا گیا ہے کہ وہ انتخابات سے ایک روز قبل پولنگ اسٹیشنوں کا کنٹرول سنبھال لیں اور10 مئی کی رات کو وہاں ہی قیام کریں۔ انتخابات سے ایک روز قبل پریزائیڈنگ افسران کو بیلٹ پیپر اور دیگر متعلقہ سامان فراہم کر دیا جائے گا جو11 مئی کو ووٹنگ شروع ہونے سے قبل تمام پولنگ ایجنٹس کی موجودگی میں کھولا جائے گا۔دریں اثنا الیکشن کمیشن نے عام انتخابات میں رائے دہندگان کو تمام معلومات فراہم کرنے کیلیے الیکٹرانک پرچی کا باضابطہ آغازکردیا۔

پیر کو منعقدہ خصوصی تقریب میں الیکٹرانک پرچی کا افتتاح کیا گیا جس کے تحت ووٹر اپنے موبائل سے صرف شناختی کارڈ نمبر8300پر ایس ایم ایس کرے گا اور چند لمحوں میں اسے پولنگ اسٹیشن کا نام، حلقہ نمبر، کتاب نمبر اور ووٹ نمبر کی معلومات مل جائیں گی۔اس موقع پر سیکریٹری الیکشن کمیشن اشتیاق احمد خان نے کہا کہ پاکستان واحد ملک ہے۔



جہاں یہ سہولت متعارف کرائی جارہی ہے۔ انھوں نے عوام سے کہا کہ 11 مئی کو موبائل سروس بند ہونے کے خطرے کے پیش نظر جلد از جلد اپنے کوائف معلوم کرلیں۔ بیلٹ پیپرز کی چوری کا کوئی امکان نہیں کیوں کہ اس کی چھپائی اور ترسیل کا سارا عمل پاک فوج کی زیر نگرانی مکمل کیا جارہا ہے۔ آن لائن کے مطابق سیکریٹری الیکشن کمیشن اشتیاق احمد خان نے پریس کانفرنس سے خطاب کرتے ہوئے کہا کہ الیکشن کمیشن نے عوام سے انقلابی اقدام کا وعدہ کیا تھا جو پورا کردیا ہے۔

11مئی کو 8کروڑ 61لاکھ ووٹر ووٹ ڈالنے کیلیے نکلیں گے۔ اساتذہ الیکشن ڈیوٹی کیلیے راضی ہوگئے ہیں اور 11مئی کو7 لاکھ 20ہزار پولنگ اسٹاف اپنی ڈیوٹی نبھائے گا۔ ایک سوال پر انھوں نے کہا کہ انتخابات کے موقع پر 2 دن کے لیے ملک بھر میں لوڈ شیڈنگ نہیں کی جائے گی۔ موبائل فون سروس معطل ہونے کے امکانات موجود ہیں۔ اس موقع پر ڈی جی الیکشن کمیشن نے کہا کہ ذاتیات پر مبنی اشتہارات کی روک تھام کے اقدام کیلیے پیمرا کو ضروری ہدایات جاری کردی ہیں۔ایک سوال پرجسٹس ریٹائرڈ کیانی نے کہا کہ انتخابات ملتوی نہیں ہونگے۔