جعلی ووٹ ڈالنے والے کو دو سال قید کی سزا ہوگی

ویب ڈیسک  ہفتہ 21 جولائی 2018
ملکی تاریخ میں پہلی بار ٹینڈر ووٹ کی بھی گنتی کرنے کا فیصلہ فوٹو:فائل

ملکی تاریخ میں پہلی بار ٹینڈر ووٹ کی بھی گنتی کرنے کا فیصلہ فوٹو:فائل

اسلام آباد: الیکشن کمیشن آف پاکستان نےفیصلہ کیا ہے کہ ملکی تاریخ میں پہلی بار انتخابات کے دوران ٹینڈر ووٹ بھی گنے جائیں گے اور جعلی ووٹ ڈالنے والے کو دو سال قید کی سزا ہوگی۔

ایکسپریس نیوز کے مطابق الیکشن کمیشن نے فیصلہ کیا ہے کہ انتخابات 2018 میں ٹینڈر ووٹ کی بھی گنتی ہوگی۔ کسی اور کے نام پر ووٹ کاسٹ ہونے پر اصلی اور جعلی دونوں ووٹ گنے جائیں گے، تاہم ٹینڈر ووٹ کے لیے الگ بیلٹ باکس ہوگا۔ ووٹنگ کے نتائج جاری ہونے کے بعد معاملہ تحقیقات کے لیے نادرا کو بھجوایا جائے گا جہاں پر انگوٹھے کے نشان سے معلوم کیاجائے گا کہ جعل سازی کس شخص نے کی۔

تحقیقات کے بعد جعلی ووٹ ڈالنے اورجعل سازی کرنےوالے شخص کو  2 سال جیل کی سزا ہوگی۔ الیکشن کمیشن نے ریٹرننگ افسران کو ہدایت جاری کرتے ہوئے کہا ہے کہ یہ فیصلہ مجبوری کے تحت کیا، اس کے ذمہ دار پارلیمنٹیرینز ہیں۔

ٹینڈرڈ ووٹ کیا ہوتا ہے

انتخابات والے دن اگر کوئی شخص ووٹ ڈالنے آئے اور پتہ چلے کہ اس کا ووٹ پہلے ہی جعل سازی سے ڈالا جاچکا ہے، تو پریزائڈنگ افسر اس ووٹر کو ووٹ ڈالنے کی اجازت دے سکتا ہے۔ ایسے ووٹ کو ٹینڈر ووٹ کہا جاتا ہے۔ پریزائڈنگ افسر اس ووٹ کو بیلٹ باکس کے بجائے خصوصی ٹینڈر بیلٹ پیکٹ میں ڈالے گا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔