کرکٹ ایشیا کپ شریک چھٹی ٹیم کا 6 ستمبر کو فیصلہ

کوالیفائرز29 اگست سے ملائیشیا میں شیڈول،افتتاحی روز 3میچز کھیلے جائیں گے۔ فوٹو: فائل

---

کرکٹ ایشیا کپ میں شرکت کرنے والی چھٹی ٹیم کا فیصلہ 6ستمبر کو ہوگا جب کہ ملائیشیا میں 29 اگست سے شیڈول کوالیفائنگ رائونڈ کے افتتاحی روز 3میچز کھیلے جائیں گے۔

15 ستمبر سے شروع ہونے والے ایشیا کپ میں 6ٹیمیں شریک ہوںگی،گروپ ''اے'' میں پاکستان، بھارت اور ایک کوالیفائرکو شامل کیا گیا ہے،''بی'' میں سری لنکا، بنگلہ دیش اور افغانستان کو جگہ ملی ہے، ملائیشیا میں کھیلے جانے والے کوالیفائنگ رائونڈ میں یو اے ای، سنگاپور، اومان، نیپال، ملائیشیا اور ہانگ کانگ کی ٹیمیں حصہ لیں گی،ان میں سے کسی ایک کو ایشیا کپ کا ٹکٹ حاصل ہوگا۔

ایشین کرکٹ کونسل کی جانب سے کوالیفائرز کے شیڈول کا اعلان کردیا گیا ہے، 29 اگست کو افتتاحی روز ملائیشیا اور ہانگ کانگ کا مقابلہ ہوگا،نیپال اور اومان کی ٹیمیں بھی آمنے سامنے ہونگی۔

یواے ای کو سنگاپور کا چیلنج درپیش ہے،اگلے روزیواے ای کا میچ نیپال کے ساتھ شیڈول کیا گیا ہے،ہانگ کانگ اور سنگاپور،ملائیشیا و اومان کی ٹیمیں بھی مقابل ہوں گی،ایک روز آرام کے بعد یکم ستمبر کو اومان اور سنگاپورکا میچ ہوگا۔

ملائیشیا کا سامنا نیپال اور یواے ای کا ہانگ کانگ سے ہوگا،اگلے روز ہانگ کانگ کو اومان سے مقابلہ کرنا ہے،ملائیشیا کو یواے ای اور نیپال کو سنگاپورکی دیوار گرانا ہوگی،ایک دن آرام کے بعد 4 ستمبر کو ملائیشیا اور سنگاپور،یواے ای و اومان، نیپال و ہانگ کانگ کی ٹیمیں برتری کی جنگ لڑیں گی۔

سنگل لیگ کی بنیاد پر کھیلے جانے والے اس ایونٹ میں ہر ٹیم کو دیگر سے ایک،ایک میچ کھیلنا ہے، ان میں سے سرفہرست اور رنرز اپ ٹیموں کے مابین فائنل 6 ستمبر کو کھیلا جائے گا، یواے ای اور نیپال کو فیورٹس میں شمار کیا جا رہا ہے۔