انڈونیشیا میں ایشین گیمز کے پرامن انعقاد کیلئے پولیس آپریشن، 77 افراد ہلاک

ویب ڈیسک  ہفتہ 18 اگست 2018
انڈونیشیا میں ایشین گیمز کے پُرامن انعقاد کے لیے آپریشن کیا گیا فوٹو:فائل

انڈونیشیا میں ایشین گیمز کے پُرامن انعقاد کے لیے آپریشن کیا گیا فوٹو:فائل

جکارتہ: انڈونیشیا میں پولیس نے جرائم پیشہ افراد کے خلاف آپریشن میں 77 افراد کو گولی مار کر ہلاک کردیا جب کہ 52 مشتبہ ملزمان زخمی ہیں۔ 

بین الاقوامی خبر رساں ادارے کے مطابق رواں ماہ ہونے والے ایشین گیمز کے پُر امن انعقاد کے لیے پولیس کی جانب سے جنوری میں شروع کیے گئے کریک ڈاؤن میں 77 مشتبہ ملزمان کو نشانہ بنایا گیا۔

جکارتہ پولیس کے ترجمان آرگو یوانو کا کہنا ہے کہ ملزمان کو ماورائے عدالت قتل نہیں کیا گیا ہے بلکہ یہ ملزمان گرفتاری دینے کے بجائے مزاحمت کر رہے تھے جس سے عوام کی جان کو خطرات لاحق ہوگئے تھے اس لیے مجبوراً پولیس کو دفاع کرنا پڑا۔

آرگو یوانو نے دعویٰ کیا کہ مارے گئے افراد منشیات فروش اور دیگر جرائم میں ملوث تھے جب کہ جنوری سے جاری آپریشن کے دوران 2 ہزار ملزمان کو حراست میں لیا جا چکا ہے۔ جرائم پیشہ افراد کو ملک کی بدنامی کا باعث بننے نہیں دیں گے اور جرم کے خاتمے تک آپریشن جاری رہے گا۔

واضح رہے کہ انڈونیشیا کے جزیرہ سماٹرا کے شہر پلم بینگ میں 18 اگست سے 2 ستمبر تک ایشین گیمز ہوں گے، جس کے لیے دارالحکومت میں بین الاقوامی مہمانوں کی آمد کا سلسلہ جاری ہے۔ جکارتہ میں سینکڑوں اضافی سیکیورٹی افسران تعینات کیے گئے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔