تحریک انصاف کے صوبائی وزیر نے جیل قوانین کی دھجیاں اڑا دیں

صوبائی وزیر سادہ لباس میں ملبوس 6 افراد کے ہمراہ زبردستی جیل کے اندر داخل ہوئے۔ فوٹو : فائل

---

تحریک انصاف کے صوبائی وزیر پنجاب برائے جیل خانہ جات زوار حسین وڑائچ نے رات 3 بجے کوٹ لکھپت جیل کے اچانک دورے میں جیل قوانین کی سنگین خلاف ورزیاں کیں۔

ایکسپریس نیوز کے مطابق سپرنٹنڈنٹ کوٹ لکھپت جیل لاہور نے صوبائی وزیر جیل خانہ جات زوار حسین وڑائچ کے اچانک دورے کے بارے میں شکایتی رپورٹ محکمہ داخلہ میں جمع کرا دی ہے۔

سپرنٹنڈنٹ جیل اعجاز اصغرنے رپورٹ میں کہا ہے کہ صوبائی وزیر جیل خانہ جات نے بغیراطلاع کے رات 3 بج کر 15 منٹ پر جیل کا دورہ کیا اورقوانین کو بالائے طاق رکھتے ہوئے جیل کی سیکیورٹی کو خطرے میں ڈال دیا۔

رپورٹ کے مطابق صوبائی وزیر زوار حسین وڑائچ کے ساتھ سادہ کپڑوں میں ملبوس 6 افراد نے چیک پوسٹ پر تعینات ملازم کے ساتھ ہتک آمیز سلوک کیا۔ صوبائی وزیر اور ان کے گارڈز جیل کا مرکزی دروازہ زبردستی کھلوا کر جیل ڈیوڑھی میں داخل ہو گئے۔

علاوہ ازیں تحریک انصاف کے صوبائی وزیر نے کسی بھی افسراور ملازم کو جیل کے اندرجانے سے منع کر دیا اور پاکستان پریزن رولز 1978 کی خلاف ورزی کرتے ہوئے جیل ڈیوڑھی کی چابیاں دربان سے چھین کرایک مشکوک شخص کے حوالے کر دیں۔

مزید برآں صوبائی وزیرکی ٹیم نے ڈیوٹی ملازمین سے واکی ٹاکی سیٹ بھی جمع کر لیے جب کہ پاکستان پریزن رولز 1978 کے رول نمبر 922 کے تحت کوئی بھی وزیٹر جیل لاک اپ کے بعد جیل کا دورہ نہیں کرسکتا۔

جیل قانون کے مطابق کسی بھی وزیٹر کو جیل کے اندر بغیر سیکیورٹی اسکواڈ جیل کا دورہ نہیں کروایا جاسکتا اور نہ ہی موبائل فون لے جا سکتے ہیں لیکن صوبائی وزیر ڈیوٹی آفیسرسے تلخ کلامی کرتے ہوئے نہ صرف موبائل فون اندر لے گئے بلکہ اپنے ساتھ 6 دیگر افراد کو بھی جیل کے اندر لے گئے۔

سپرنٹنڈنٹ جیل اعجازاصغر نے اپنی رپورٹ میں مزید کہا کہ محکمہ داخلہ کی ہدایات کے مطابق کوئی بھی وزیٹر سپرنٹنڈنٹ جیل کی اجازت کے بغیر کسی قیدی کا انٹرویو نہیں کرسکتا۔ ہائی سیکورٹی بلاکس میں انتہائی خطرناک 109 قیدی ہیں جن میں کئی دہشت گردی اوردھماکوں کے ملزم بھی ہیں۔

رپورٹ میں مطالبہ کیا گیا ہے کہ پی ٹی آئی کے صوبائی وزیر جیل خانہ جات زوار حسین وڑائچ کے رویے سے نہ صرف جیل کی سیکیورٹی خطرے میں پڑی بلکہ ناروا سلوک کے باعث جیل عملے میں بھی بد دلی پھیل گئی ہے جس کی تحقیقات کی جانی چاہیئے۔