میڈیکل میں داخلوں کیلیے انٹر کے نتائج اگست تک جاری کیے جائیں محکمہ صحت

محکمہ صحت کے افسرکے مطابق صوبے کے تمام اعلیٰ ثانوی تعلیمی بورڈزکے حکام اگست تک انٹرمیڈیٹ کے نتائج کا اعلان کردیں. فوٹو: فائل

---

صوبائی محکمہ صحت نے کراچی سمیت صوبے کے میڈیکل کالجوں میں بروقت داخلے کیلیے صوبے کے اعلیٰ ثانوی تعلیمی بورڈز سے انٹرکے نتائج اگست تک جاری کرنے کی درخواست کردی۔

اس سلسلے میں محکمہ صحت کی جانب سے ایک مکتوب کراچی سمیت صوبے کے دیگر تعلیمی بورڈزکے حکام کو بھیج دیا گیا ہے، محکمہ صحت کے افسرکے مطابق صوبے کے تمام اعلیٰ ثانوی تعلیمی بورڈزکے حکام اگست تک انٹرمیڈیٹ کے نتائج کا اعلان کردیں تاکہ صوبے کے میڈیکل و ڈینٹل کالجوں میں بروقت داخلوں کویقینی بنایا جاسکے، مکتوب اس لیے لکھا گیا ہے کہ صوبے کے میڈیکل کالجوں میں بیک وقت داخلوںکاسلسلہ شروع کیا جا سکے، افسر کے مطابق کراچی کے اعلیٰ ثانوی تعلیمی بورڈکے حکام نے انٹرکے نتائج ستمبر تک جاری کرنے کا کہا ہے جبکہ اندرون سندھ کے دیگر اعلیٰ ثانوی تعلیمی بورڈز نے30 اگست تک نتائج جاری کرنے کی یقین دہانی کرائی ہے۔



صوبائی محکمہ تعلیم اور صوبائی محکمہ صحت میں رابطے کے فقدان کے سبب سندھ کے تعلیمی بورڈز اگست تک انٹرمیڈیٹ کے نتائج کااعلان نہیں کرسکیں گے جس کی وجہ سے صوبے کے میڈیکل کالجوں میں امسال داخلوں کا عمل تاخیر سے شروع ہوگا، محکمہ صحت کے افسر نے مزید بتایا کہ انٹر کے نتائج تاخیر سے جاری کرنے سے امسال ایم بی بی ایس اور بی ڈی ایس میں داخلے کے خواہشمند امیدواروںکو پریشانی لاحق ہوسکتی ہے، واضح رہے کہ صوبائی محکمہ تعلیم اپنی اسٹیرنگ کمیٹی کے اجلاس میں سندھ کے تمام تعلیمی بورڈزکے نتائج کی تاریخیں متعین کرتاہے تاہم اس سلسلے میں صوبائی محکمہ صحت سے رابطہ نہ ہونے کے سبب میڈیکل کالجوں میں ایم بی بی ایس کے داخلوں کے شیڈول کو مدنظر نہیں رکھا جاتا۔

دوسری جانب صوبائی محکمہ صحت کی جانب سے بھی سندھ کے میڈیکل کالجوں میں داخلوں کے وقت سندھ کے تعلیمی بورڈکے نتائج جاری نہیں ہوسکیں گے، صوبائی محکمہ تعلیم اورصوبائی محکمہ صحت کی اس عدم رابطے کابراہ راست شکارصوبے کے طلبا ہوتے ہیں، صوبائی محکمہ صحت نے صوبے کے میڈیکل کالجوں میںداخلوں کیلیے3 ستمبرکوداخلہ فارم جاری کرنے اور17ستمبر کوفارم جمع کرانے کی آخری تاریخ کا اعلان کیا ہے، 6 اکتوبر کو بیک وقت انٹری ٹیسٹ منعقدکرنے کا بھی اعلان کیا گیا تھا لیکن انٹرکے نتائج تاخیر سے جاری کیے جانے پرمیڈیکل کالجوں میں داخلوں کیلیے تاخیر ہو سکتی ہے۔