جھاڑیوں میں لگی آگ سے نظارت دفتر میں کھڑی24گاڑیاں جل گئیں 

نظارت کے گراؤنڈ کی جھاڑیوں میں لگنے والی آگ کو فائر بریگیڈ کا عملہ بجھانے میں مصروف ہے ۔ فوٹو : ایکسپریس

---

گلشن اقبال میں جھاڑیوں میں لگنے والی آگ نظارت آفس تک پہنچ گئی ، جس کے نتیجے میں 24 سے زائدگاڑیاں اور موٹرسائیکلیں آگ کی لپیٹ میں آگئیں۔

اطلاع ملنے پر فائر بریگیڈ کی 6 گاڑیوں نے امدادی کارروائیوں میں حصہ لیا اور 4گھنٹے طویل جدوجہد کے بعد آگ پر قابو پالیا ، تفصیلات کے مطابق گلشن اقبال میں الہ دین پارک کے قریب نظارت آفس کے باہر جھاڑیوں میں گذشتہ روز آگ لگ گئی ، آگ دیکھتے ہی دیکھتے پھیلتی چلی گئی اور آگ کے شعلے آسمان سے باتیں کرنے لگے ، تیزہوا کے باعث آگ نظارت آفس میں کھڑی گاڑیوں تک پہنچ گئی، فائر بریگیڈ حکام کے مطابق اطلاع ملتے ہی فائر بریگیڈ کی 2 گاڑیوں کو موقع پر روانہ کیا گیا لیکن آگ تیزی سے بڑھتی چلی گئی ۔



جس پر مزید گاڑیاں طلب کی گئیں ، مجموعی طور پر 6 گاڑیوں اور ایک واٹر بائوزر نے امدادی کارروائیوں میں حصہ لیا، فائر بریگیڈ حکام نے مزید بتایا کہ آگ کے باعث نظارت آفس میں کھڑی 2 درجن سے زائد گاڑیاں بسیں ، ٹرک اور موٹرسائیکلوں کو نقصان پہنچا ، بیشتر گاڑیوں کو جلنے سے بچالیا گیا جبکہ کچھ کو جزوی طور پر بھی نقصان پہنچا ، فوری طور پر آگ لگنے کی وجوہات کا علم نہیں ہوسکا ، فائر بریگیڈ حکام نے مزید بتایا کہ آگ اتنی شدید تھی کہ آگ پر قابو پانے میں 4گھنٹے سے زائد کا وقت لگ گیا ۔