سندھ دشمن منصوبوں کیخلاف آگاہی مہم شروع کی جائیگی ریاض چانڈیو

ریاض چانڈیو نے اعلان کیا کہ سندھ کے علاقے تھر میں نکلنے والے کوئلے اور دیگر معدنی وسائل کے حوالے سے سندھ کے باسیوں کو آگاہی دینے کے لیے15 اگست کو پورے سندھ میں آگاہی مہم شروع کی جائے گی۔

---

سندھ میں پانی کی قلت، معدنی وسائل پر قبضے اور ذوالفقارآباد منصوبہ کے خلاف قوم پرست جماعت جیے سندھ محاذ (ریاض چانڈیو گروپ) کے تحت نسیم نگر چوک قاسم آباد پر کی جانے والی سو گھنٹے کی علامتی بھوک ہڑتال پارٹی چیئرمین ریاض چانڈیو نے ختم کروادی۔

اس موقع پر انھوں نے اعلان کیا کہ سندھ کے علاقے تھر میں نکلنے والے کوئلے اور دیگر معدنی وسائل کے حوالے سے سندھ کے باسیوں کو آگاہی دینے کے لیے15 اگست کو پورے سندھ میں آگاہی مہم شروع کی جائے گی، جب کہ 28 اگست کو سندھ کے معدنی وسائل پر قبضے کے خلاف گمبٹ بائی پاس پر دھرنا دیا جائے گا۔ انھوں نے کہا کہ حکمرانوں کی غلط پالیسیوں کے باعث سندھ میں پانی کی قلت ہے، نہروں میں پانی نہیں مٹی اُڑ رہی ہے، پانی کی قلت کے باعث سندھ میں زراعت تباہ ہوگئی ہے ۔



زمینیں بنجر بن گئی ہیں لیکن اس کے باوجود حکمران سندھ دشمن منصوبہ کالا باغ ڈیم بنانے کی باتیں کررہے ہیں جس سے سندھ مزید خشک سالی کا شکار ہوجائے گا، جبکہ ٹھٹھہ میں بنایا جانے والا ذوالفقار آباد منصوبہ سندھ دشمن منصوبہ ہے جس کا مقصد صرف سندھ میں رہائش پذیر عوام کو اقلیت میں تبدیل کرنا ہے۔انھوں نے کہا کہ ماضی کی طرح سندھ دشمن منصوبوں کے خلاف سندھ کے عوام کے ساتھ مل کر بھرپور احتجاج کیا جائے گا۔